- Auglýsing -
- Andrea Jacobsen skoraði tvö mörk í fjórum skotum og átti tvær stoðsendingar í góðum sigri Silkeborg-Voel á Horsens, 40:33, í dönsku úrvalsdeildinni í handknattleik í gærkvöld. Andrea og félagar voru fjórum mörkum yfir í hálfleik, 20:16. Silkeborg-Voel hefur gert það gott upp á síðkastið og hefur fyrir vikið jafnt og þétt unnið stig upp stigatöfluna. Nú um stundir er liðið í 7. sæti með 16 stig þegar 16 umferðir eru að baki. Tíu umferðum er ólokið.
- Storhamar, liðið sem Axel Stefánsson þjálfar, vann Oppsal, 42:30, í norsku úrvalsdeildinni í handknattleik kvenna í gærkvöld. Storhamar er í öðru sæti eins og áður með 28 stig þegar 16 leikjum er lokið. Vipers vann Byåsen örugglega og heldur efsta sætinu með 30 stig eftir 15 leiki.
- Norska handknattleikskonan Stine Oftedal er sögð ekki hafa í hyggju að skrifa undir nýjan samning við ungverska meistaraliðið Györ þegar núverandi samningur rennur út í sumar. Oftedal, sem er á 33. aldursári, mun ætla að taka sér frí frá handbolta eftir Ólympíuleikana í Frakklandi en útilokar ekki að mæta aftur út á völlinn síðar. Oftedal hefur lengi verið í fjarbúð með þýska landsliðsmanninum Rune Dahmke. Oftedal er á sínu sjöunda ári hjá Györ.
- (Un)informed Handball Hour sagði frá því í gær á X að spænska handknattleikssambandið og Handknattleikssamband Evrópu séu að skoða hvort mögulegt sé að úrslitaleikur Evrópumóts karla í handknattleik sem fram á að fara á Spáni eftir fjögur ár verði háður á heimavelli knattspyrnuliðsins Real Madrid, Bernabeu.
- Fimm leikmenn landsliðs Barein, sem Aron Kristjánsson þjálfar, eru sagðir hafa ráðist á annan dómara viðureignar Barein og Japan í undanúrslitum Asíukeppninnar í fyrradag. Árásin á að hafa átt sér stað þegar leiknum var lokið. Barein tapaði með þriggja marka mun, 20:17, og leikur við Kúveit um bronsverðlaunin í dag. Ekki er vitað hvort atvikið dragi dilk á eftir sér.
- Auglýsing -
