- Auglýsing -
- Andrea Jacobsen og Díana Dögg Magnúsdóttir náðu þeim áfanga í gær að klæðast landsliðspeysunni í 50. skipti í sigurleiknum á Kongó um forsetabikarinn góða á heimsmeistaramótinu í handknattleik. Til viðbótar lék Lilja Ágústsdóttir sinn 20. A-landsleik í gærkvöld.
- Þorgils Jón Svölu Baldursson var eini Íslendingurinn af þremur sem eru hjá HF Karlskrona sem lék með liðinu í gær í sigurleik á Önnereds, 28:27, í sænsku úrvalsdeildinni í handknattleik. Ólafur Andrés Guðmundsson og Dagur Sverrir Kristjánsson voru ekki með vegna meiðsla. Phil Döhler þurfi ekkert að láta til sín taka í marki liðsins vegna þess að félagi hans Uros Tomic, varði eins berserkur 22 skot, 47%. Karlskrona er áfram í 11. sæti af 14 liðum deildarinnar.
- Þótt Arnar Birkir Hálfdánsson væri ekki alveg á deginum sínum í gær þá kom það ekki að sök því Amo náði í annað stigi í heimsókn til Hammarby í sænsku úrvalsdeildinni í handknattleik. Lokatölur, 31:31. Arnar Birkir skoraði aðeins eitt mark í 10 skotum. Hvert stig er Amo mikilvægt í baráttunni í neðri hlutanum en liðið er með 10 stig eftir 13 leiki eins og Karlskrona sem getið er um að ofan.
- Stöðuna í sænsku úrvalsdeildinni og í fleiri deildum í evrópskum handknattleik er að finna hér.
- Liðsmenn TTH Holstebro sem Arnór Atlason þjálfar töpuðu illa fyrir meisturum GOG, 40:26, í dönsku úrvalsdeildinni í handknattleik í gærkvöld en leikið var á Fjóni. Holstebro situr í 11. sæti af 14 liðum deildarinnar eftir 17 umferðir eins og sjá má hér.
- Óðinn Þór Ríkharðsson og samherjar í Kadetten Schaffhausen töpuðu í gærkvöld fyrir GC Amicitia Zürich, 25:24, í Zürich í viðureign liðanna í svissnesku A-deildinni í handknattleik. Óðinn Þór skoraði átta mörk, geigaði ekki á skoti. Honum verður ekki kennt um tapið sem var aðeins annað í 17 leikjum í deildinni í vetur. Kadetten er áfram efst, þremur stigum fyrir ofan GC Amicitia Zürich.
- Grétar Ari Guðjónsson varði 6 skot, 33% hlutfall, þann tíma sem hann varði mark Sélestat í gærkvöld í tapleik fyrir Dunkerque í 16-liða úrslitum frönsku bikarkeppninnar, 27:24.
- Haukur Þrastarson skoraði fjögur mörk, flest ef ekki öll úr vítaköstum, þegar Industria Kielce vann Energa MKS Kalisz, 38:21, í pólsku úrvalsdeildinni í handknattleik í gær. Stöðuna í pólsku úrvalsdeildinni og í fleiri deildum í Evrópu er að finna hér.
- Auglýsing -
