- Auglýsing -
- Ekkert varð af því að Andrea Jacobsen og liðsfélagar hennar í Silkeborg-Voel sæktu Ajax København heim í fyrstu umferð nýs árs í dönsku úrvalsdeildinni í gær eins og til stóð. Leiknum, sem fram átti að fara í Kaupmannahöfn, var slegið á frest vegna óveðurs sem gekk yfir Danmörku í gær og olli m.a. verulegum truflunum á samgöngum, ekki síst á milli landshluta. Silkeborg-Voel er með bækistöðvar á miðju Jótlandi og því drjúgur spölur til höfuðborgarinnar. Um 40 sentímetrar jafnfallinn snjór var í Silkeborg síðdegis í gær, nokkuð sem er mjög óvenjulegt.
- Erlingur Richardsson, sem stýrði ÍBV til sigurs á Íslandsmótinu í handknattleik karla á síðasta vori, var í gær heiðraður fyrir framlag sitt til íþróttamála í Vestmannaeyjum þegar Eyjafréttir veitti Erlingi Fréttapýramídann. Eyjafréttir heiðrar ár hvert einstaklinga sem með störfum sínum bætir mannlíf og ber út hróður Vestmannaeyja. Erlingur gat ekki tekið við viðurkenningunni vegna þess að hann er staddur í Sádi Arabíu við undirbúning landsliðsins fyrir Asíumótið. Erlingur er landsliðsþjálfari Sádi Arabíu. Faðir hans og synir tóku við viðurkenningunni.
- Eftir tap fyrir Larvik í fyrsta leik eftir HM-hléið þá vann Storhamar liðskonur Molde, 36:27, á heimavelli í norsku úrvalsdeildinni í handknattleik í gær. Axel Stefánsson er annar þjálfari Storhamar sem er í öðru sæti deildarinnar með 22 stig að loknum 13 leikjum. Vipers er efst sem fyrr með 24 stig eftir 12 leiki. Larvik er fjórum stigum á eftir Storhamar í þriðja sæti.
- Norska karlalandsliðið í handknattleik verður án tveggja öflugra leikmanna, Gøran Søgard Johannessen og Magnus Abelvik Rød, á æfingamóti sem hefst í Danmörku í dag og lýkur á sunnudaginn. Báðir eru þeir meiddir og sagðir vera í kapphlaupi við tímann að ná Evrópumótinu. Vika er í fyrsta leik Noregs á EM sem verður við Pólverja í Berlín.
- Norðmenn mæta Dönum í kvöld á æfingamótinu í Danmörku. Einnig taka landslið Egyptalands og Hollands þátt í mótinu.
- Aron Kristjánsson er mættur með landslið Barein til Frakklands þar sem í dag hefst fjögurra liða mót í handknattleik karla. Auk Bareina, taka Brasilíumenn, Frakkar og Túnisbúar þátt í mótinu. Landslið Barein er á leiðinni á Asíumótið sem hefst eftir átta daga hvar keppt verður um þátttökurétt á HM á næsta ári.
- Auglýsing -
