- Auglýsing -
- Andrea Jacobsen átti tvær stoðsendingar en náði ekki að skora þegar Silkeborg-Voel vann Ajax, 35:25, í viðureign liðanna í dönsku úrvalsdeildinni í handknattleik í gær. Leikið var á heimavelli í Ajax í Kaupmannahöfn. Viðureignin átti að fara fram fyrr í vikunni en var þá frestað vegna slæms veðurs og ófærðar. Silkeborg-Voel er áfram í 11. sæti af 14 liðum deildarinnar en mjakaðist fjær allra neðstu liðunum með sigrinum.
- Kasper Christensen sem náð hefur frábærum árangri með danska kvennaliðið Ikast hættir hjá félaginu í lok leiktíðar. Við þjálfun Ikast tekur Søren Hansen sem nú er aðstoðarþjálfari TTH Holstebro og hægri hönd Arnórs Atlasonar með karlalið félagsins. Christensen vendir kvæði sínu í kross. Hættir þjálfun kvennaliðs og tekur við þjálfun karlaliðs GOG.
- Portúgalski handknattleiksmaðurinn Andre Gomes hefur verið leystur undan samningi við Al Safa í Sádi Arabíu. Gomes samdi við félagið til eins árs á síðasta sumri og átti að fá formúgu fjár í fyrir vikið. Hvort sem það gekk eftir eða ekki þá hefur samstarfinu verið slitið, hálfu ári áður en til stóð. Gomes var þar áður leikmaður MT Melsungen í Þýskalandi. Óvíst er hvað hann tekur sér fyrir hendur.
- Daniel Gordo hefur samið um að vera þjálfari karlalandsliðs Tyrklands til ársins 2025. Hann heldur áfram sínu striki með Ademar León í heimalandi sínu. Gordo var þjálfari Meshkov Brest í Hvíta-Rússlandi áður en Rússar réðust inn í Úkraínu fyrir nærri tveimur árum. Hann sleit samstarfinu við Meshkov Brest fljótlega eftir innrásina.
- Suður kóreanska stórskyttan Ryu Eun Hee hefur framlengt samning sinn við ungverska meistaraliðið Györ til eins árs, fram til ársins 2025. Hee, sem er 33 ára gömul, kom til Györ sumarið 2021. Hún er burðarás landsliðs Suður Kóreu og ein öflugasta örvhenta skyttan í kvennahandknattleik í Evrópu.
- Auglýsing -
