- Auglýsing -
- Andrea Jacobsen skoraði tvö mörk og átti tvær stoðsendingar þegar lið hennar Silkeborg-Voel vann SønderjyskE, 35:30, á heimavelli í dönsku úrvalsdeildinni í handknattleik í gær. Þetta var annar sigur Silkeborg-Voel í röð og er liðið þar með komið í 7. sæti af 14 liðum deildarinnar með 14 stig að loknum 15 leikjum. Stöðuna í dönsku úrvalsdeildinni og í fleiri deildum í evrópskum handknattleik er að finna hér.
- Harpa Rut Jónsdóttir skoraði eitt mark fyrir GC Amicitia Zürich í fjögurra marka tapi fyrir efsta liði svissnesku A-deildarinnar, LC Brühl Handball, 28:24, í gærkvöld. Leikurinn fór fram í St. Gallen Kreuzbleiche, heimavelli LC Brühl. GC Amicitia Zürich er í fimmta sæti.
- Storhamar situr áfram í öðru sæti í norsku úrvalsdeildinni í kvennaflokki eftir sigur á Romerike Ravens, 34:29, á heimavelli í gær. Axel Stefánsson er annar þjálfara Storhamar sem er tveimur stigum á eftir Vipers. Vipers á leik til góða. Stöðuna í norsku úrvalsdeildinni og í fleiri deildum í evrópskum handknattleik er að finna hér.
- Ekkert varð að af leik Fredrikstad Bkl. og Tertnes í norsku úrvalsdeild kvenna í gær. Veður setti þar strik í reikning. Elías Már Halldórsson er þjálfari Fredrikstad Bkl. sem situr í fimmta sæti deildarinnar með 17 stig en á m.a. tvo leiki inni á Storhamar.
- Tuttugu íþróttamenn hafa verið tilefndir í kjöri íþróttakarls og -konu á Akureyri fyrir nýliðið ár. Meðal þeirra eru þrennt handknattleiksfólk; Matea Lonac, Dagur Gautason og Einar Rafn Eiðsson. Kjöri íþróttafólks Akureyrar verður lýst á íþróttahátíð Akureyrar í Hofi miðvikudaginn 31. janúar
- Eftir að hafa verið valinn í lið norsku úrvalsdeildarinnar þrjá mánuði í röð var Dagur Gautason leikmaður ØIF Arendal í liði fyrri hluta keppnistímabilsins í deildinni en liðið var tilkynnt í upphafi ársins.
- Auglýsing -
