- Auglýsing -
- Andrea Jacobsen og liðsmenn Silkeborg-Voel unnu baráttusigur á København Håndbold, 33:32, í 18. umferð dönsku úrvalsdeildarinnar í handknattleik í gærkvöld. Leikurinn fór fram í Kaupmannahöfn. Andrea kom lítið við sögu í leiknum. Silkeborg-Voel er komið upp í 5. sæti úrvalsdeildarinnar með 20 stig eftir 18 leiki, tveimur stigum fyrir ofan Viborg og fjórum stigum á eftir Nykøbing Falster. Stöðuna í dönsku úrvalsdeildinni og í fleiri deildum evrópsks handknattleiks er að finna hér.
- Austurríski landsliðsmarkvörðurinn, Constantin Möstl, sem gerði leikmönnum íslenska landsliðsins skráveifu í viðureign Austurríkis og Íslands á EM í síðustu viku hefur samið við þýska liðið Lemgo. Möstl, sem er 23 ára gamall og leikur nú undir stjórn Hannesar Jóns Jónssonar hjá Alpla Hard í Austurríki, flytur sig um set í sumar.
- Annar markvörður, Peter Johannesson, kveður Bergischer HC í sumar og verður liðsmaður danska meistaraliðsins GOG. Svíinn leysir af af hólmi landa sinn Tobias Thulin sem flytur til Pick Szeged og verður samherji Janusar Daða Smárasonar. Salah Boutaf mun einnig verja mark GOG á næstu leiktíð. Hann kemur til félagsins frá Skanderborg AGF.
- Nokkrir franskir fjölmiðlar sögðu frá því að gær að Benoît Kounkoud einn leikmanna nýkrýndra Evrópumeistara Frakka í handknattleik hafi verið handtekinn á veitingastað í París aðfaranótt þriðjudagsins eftir að hafa reynt að nauðga konu á staðnum.
- Auglýsing -
