- Auglýsing -
- Arnar Birkir Hálfdánsson hreppti bronsverðlaun í sænsku bikarkeppninni í handknattleik í gær þegar Amo HK vann Önnereds, 36:27, í leiknum um þriðja sætið. Arnar Birkir skoraði þrjú mörk í leiknum. Ystads IF HK, sem vann Amo í undanúrslitum á laugardaginn varð bikarmeistari eftir sigur á Hammarby í úrslitaleik, 33:32.
- EHV Aue hefur ekki sagt sitt síðasta orð í fallslag 2. deildar þýska handknattleiksins. Liðið vann Tusem Essen á heimavelli í gær, 26:21. Ólafur Stefánsson tók við þjálfun EHV Aue síðla á síðasta ári og hefur síðan unnið hörðum höndum við að rétta af skútuna. Sveinbjörn Pétursson var í marki EHV Aue allan leikinn í gær og varði 12 skot, 39%.
- EHV Aue rekur ennþá lestina í deildinni með 10 stig eftir 23 leiki og er þremur stigum á eftir TuS Vinnhorst sem er næst fyrir ofan. GWD Minden er með 14 stig í þriðja neðsta sæti. EHV Aue á leik inni á bæði lið.
- Örn Vésteinsson Östenberg skoraði ekki mark fyrir VfL Lübeck-Schwartau þegar liðið tapaði fyrir Eulen Ludwigshafen, 32:28, í 2. deild þýska handknattleiksins í gær. Leikurinn fór fram í Ludwigshafen. VfL Lübeck-Schwartau er í 10. sæti af 18 liðum, siglir lygnan sjó.
- Sigvaldi Björn Guðjónson skoraði þrjú mörk fyrir Kolstad þegar liðið vann Sandnes, 31:25, á heimavelli í 22. umferð norsku úrvalsdeildarinnar í handknattleik í gær. Kolstad hefur örugga forystu í deildinni, hefur unnið 20 af 22 leikjum til þessa og gert eitt jafntefli auk eins tapleiks. Elverum er í öðru sæti en nánar má kynna sér stöðuna í norsku úrvalsdeildinni og í fleiri deildum í evrópskum handknattleik hér.
- Storhamar, liðið sem Axel Stefánsson þjálfar við annan mann, tapaði fyrir Vipers Kristiansand, 30:20, á heimavelli þegar tvö efstu lið norsku úrvalsdeildarinnar í kvennaflokki mættust í gær. Þetta var 21. sigur Vipers í deildinni í vetur en liðið hefur ekki tapað stigi. Storhamar er í öðru sæti, fjórum stigum á eftir Vipers en hefur leikið einum leik fleira.
- Katrine Lunde er fékk aðsvif í kappleik með Vipers í síðustu viku mætti til leiks með Vipers í gær og fór á kostum. Lunde varði 16 skot, 50%, þann tíma sem hún stóð í marki liðsins.
- Bjarki Már Elísson var markahæstur ásamt þremur öðrum leikmönnum Telekom Veszprém með sex mörk þegar liðið vann QHB Eger, 39:29, í 18. umferð ungversku 1. deildarinnar í gær á heimavelli. Telekom Veszprém er efst og taplaust í deildinni. Pick Szeged er næst á eftir með 30 stig að loknum 17 leikjum.
- Auglýsing -
