- Auglýsing -
- Arnbjörg Bertha Kristjánsdóttir hefur skrifað undir samning við meistaraflokkslið Víkings í handknattleik. Arnbjörg er 18 ára gömul og kemur til Víkings frá Fram þar sem hún hefur spilað með ungmennaliði liðsins síðustu ár. Arnbjörg leikur á línunni. Koma hennar eykur á breiddina í leikmannahópi Víkings fyrir átökin í Grill 66-deildinni á næsta keppnistímabili.
Konur – helstu félagaskipti 2023
- Norska landsliðið í handknattleik kvenna undir stjórn Þóris Hergeirssonar steinlá fyrir franska landsliðinu í vináttulandsleik í Bodø Spektrum í gær, 30:18. Þórir tefldi fram átta nýliðum í leiknum. Frakkar voru fjórum mörkum yfir í hálfleik, 14:10. Norska liðið fékk ekki við neitt ráðið í síðari hálfleik. Kristina Novak skoraði fjögur mörk fyrir norska landsliðið og Orlane Kanor fimm fyrir Frakka. Þær voru markahæstar. Bæði landslið hafa undanfarna daga verið í æfingabúðum.
- Franska landsliðið verður í riðli með íslenska landsliðinu á heimsmeistaramóti kvenna sem hefst í 28. nóvember.
- Camilla Herrem lék sinn fyrsta landsleik fyrir Noreg í meira en ár en hún átti annað barn sitt snemma á árinu. Herrem skoraði tvö mörk í leiknum. Einnig hélt Katrine Lunde markvörður áfram að bæta landsleikjamet sitt. Leikurinn í Bodø var hennar 362. á ferlinum í landsliðsbúningnum. Lunde stóð aðeins á milli stanganna hluta leiksins.
- San Francisco CalHeat Team Handball Club tryggði sér í gær þátttökurétt á heimsmeistaramóti félagsliða í handknattleik karla sem fram fer í Sádi Arabíu í október. Þetta var í annað sinn á þremur árum sem félagið vinnur sér sæti í keppninni.
- Stórskyttan Oliver Rabek leikur ekki fleiri leiki fyrir Tatran Presov í Slóvakíu. Það væri í sjálfu sér ekki í frásögur færandi nema vegna þess að Rabek, sem er 35 ára gamall, hefur leikið með Tatran Presov í 11 ár. Nú á tímum gerist sjaldgæfara að handknattleikfólk staldri svo lengi við hjá sama liðinu.
- Auglýsing -
