- Auglýsing -
- Arnór Snær Óskarsson skoraði eitt mark fyrir Rhein-Neckar Löwen þegar liðið sótti tvö stig í heimsókn til Bergischer HC, 31:29, í þýsku 1. deildinni í handknattleik gær. Þetta var annar sigur Rhein-Neckar Löwen í röð á fáeinum dögum og er liðið nú komið upp í miðja deild en á ennþá einn til tvo leiki á liðin fyrir ofan. Ýmir Örn Gíslason skoraði ekki mark fyrir Rhein-Neckar Löwen að þessu sinni.
- Arnór Þór Gunnarsson er aðstoðarþjálfari Bergischer HC. Liðið er ekki í alltof góðum málum en það vermir neðsta sæti þýsku 1. deildarinnar með tvö stig að loknum sex leikjum.
- Aldís Ásta Heimisdóttir skoraði fimm mörk fyrir Skara HF og Jóhanna Margrét Sigurðardóttir og Katrín Tinna Jensdóttir eitt mark hvor þegar lið þeirra tapaði naumlega á heimavelli, 28:27, fyrir Skuru IK í sænsku úrvalsdeildinni í handknattleik í gær. Leikmenn Skara HF fengu tækifæri til þess að jafna metin á síðustu sekúndunum en fóru illa að ráði sínu í síðustu sókn.
- Aldís Ásta gaf einnig fimm stoðsendingar í leiknum og Jóhanna Margrét eina. Skara HF er í níunda sæti af 12 liðum deildarinnar með tvö stig að loknum þremur leikjum.
- Arnar Birkir Hálfdánsson skoraði fjögur mörk fyrir Amo HK í stórsigri á Önnered, 37:25, í sænsku úrvalsdeildinni í handknattleik karla í gær. Amo HK er efst í sænsku úrvalsdeildinni eftir tvær umferðir með fjögur stig eins og Sävehof sem lagði HK Karlskrona, 35:26, í Partille í gær.
- Tryggvi Þórisson skoraði ekki mark fyrir Sävehof í sigurleiknum gær. Dagur Sverrir Kristjánsson skoraði þrjú mörk fyrir HF Karlskrona og Ólafur Andrés Guðmundsson tvö. Þorgils Jón Svölu Baldursson var ekki í leikmannahópi Karlskrona.
- Ólafur Andrés lék aðeins í um 10 mínútur með Karlskrona í gær en hann glímir við meiðsli. Phil Döhler sneri sig á ökkla í fyrsta leik Karlskrona og gat ekki beitt sér af krafti í gær. Hann varði engu að síður þrjú vítaköst.
- Vonir standa til þess að Þorgils Jón geti verið með Karlskrona í næsta leik liðsins í sænsku úrvalsdeildinni. Hann er meiddur sem stendur.
- Fredrikstad Bkl., sem Elías Már Halldórsson þjálfar, vann Oppsal, 29:25, á heimavelli í 5. umferð norsku úrvalsdeildar kvenna í handknattleik í gær. Fredrikstad Bkl. færðist upp í 5. sæti deildarinnar með þessum góða sigri.
- Birta Rún Grétarsdóttir var í fyrsta sinn í leikmannahópi Fjellhammer á leiktíðinni í gær þegar liðið vann Glassverket í næst efstu deild norska handknattleiksins. Birta Rún samdi við Fjellhammer í sumar eftir að hafa æft með liðinu um skeið meðan hún var að ná sér eftir að hafa slitið krossband. Fjellhammer er í fjórða sæti deildarinnar með fjögur stig eftir þrjá leiki.
- Volda er efst í næst efstu deild kvenna í Noregi eftir öruggan sigur á heimavelli á Fyllingen frá Bergen, 32:22. Dana Björg Guðmundsdóttir var markahæst hjá Volda með átta mörk en hún er eini Íslendingurinn sem er eftir hjá félaginu.
- Harpa Rut Jónsdóttir skoraði ekki mark þegar lið hennar, GC Amicitia Zürich, tapaði 28:24, í heimsókn á gamla heimavöll Hörpu Rutar hjá LK Zug í svissnesku A-deildinni í handknattleik í gær. Þetta var fyrsti tapleikur GC Amicitia Zürich í deildinni. Liðið er í þriðja sæti deildarinnar með fimm stig eftir fjóra leiki eins og LK Zug. Brühl er efst með sex stig.
- Auglýsing -
