- Auglýsing -
- Berta Rut Harðardóttir skoraði þrjú mörk í tíu marka sigri Kristianstad, 31:21, í síðari leik liðsins við BK Heid í 16-liða úrslitum sænsku bikarkeppninnar í gær. Kristianstad vann báðar viðureignir liðanna samanlagt, 62:44.
- Katrín Tinna Jensdóttir skoraði sex mörk fyrir Skara HF í gær í síðari viðureign liðsins við Västeråslrsta í 16-liða úrslitum sænsku bikarkeppninnar í gær. Skara vann leikinn, 31:25, en féll engu að síður úr leik eftir 13 marka tap í fyrri viðureign liðanna. Jóhanna Margrét Sigurðardóttir skoraði tvö mörk fyrir Skara. Aldís Ásta Heimisdóttir komst ekki á blað að þessu sinni.
- Eftir sigur í fjórum fyrstu leikjum keppnistímabilsins í sænsku úrvalsdeildinni í handknattleik karla töpuðu nýliðar Amo fyrir Kristianstad, 32:26, á heimavelli í fimmtu umferð í gær. Arnar Birkir Hálfdánsson skoraði fjögur mörk fyrir Amo sem er áfram efst í deildinni ásamt Hammarby með átta stig eftir fimm umferðir.
- Nordsjælland tapaði fyrir Ringsted á útivelli, 27:25, í dönsku úrvalsdeildinni í handknattleik í gær. Halldór Jóhann Sigfússon er þjálfari Nordsjælland sem er í 12. sæti af 14 liðum deildarinnar með fjögur stig eftir átta leiki.
- TTH Holstebro, sem Arnór Atlason tók við þjálfun hjá í sumar, tapaði í gær á heimavelli fyrir Aalborg Håndbold, 35:27, í Holstebro. Arnór var þjálfari og síðar leikmaður hjá Álaborgarliðinu í sjö ár. Aalborg er lang efst í deildinni með 16 stig eftir átta leiki. Holstebro er í áttunda sæti með sjö stig.
- Óðinn Þór Ríkharðsson skoraði fimm mörk, þar af þrjú úr vítaköstum, í sigurleik Kadetten Schaffhausen á HSC Kreuzlingen, 23:21, í svissnesku A-deildinni í gær. Kadetten hefur góða forystu í efsta sæti deildarinnar, 17 stig eftir níu leiki. Kriens er næst með 12 stig en á leik inn á Kadetten.
- Rekstur danska úrvalsdeildarliðsins Silkeborg-Voel KFUM, sem Andrea Jacobsen gekk til liðs við í sumar, hefur tekið stakkaskiptum á undanförnu ári. Fyrir um ári stóð félagið mjög höllum fæti fjárhagslega. Með sameiginlegu átaki undanfarið ár hefur stöðunni verið snúið til betri vegar sem m.a. lýsir sér í góðum afgangi á rekstrarhliðinni síðustu 12 mánuði eftir því sem fram kemur í tilkynningu.
- Nenad Sostaric þjálfari króatíska kvennalandsliðsins í handknattleik er sagður verða næstu þjálfari karlaliðs RK Zagreb. Mikið rót hefur verið á þjálfaramálum meistaraliðsins en nýverið var Slavko Goluža sagt upp í þriðja sinn á sjö árum. Sostaric verður fimmtándi þjálfari RK Zagreb á sjö árum. Hann hefur litla reynslu af þjálfun karlaliða frá seinni árum.
- Auglýsing -
