- Auglýsing -
- Bjarki Finnbogason skoraði tvö mörk fyrir Anderstorps SK í gær þegar liðið tapaði naumlega á heimavelli, 27:26, fyrir IFK Ystads HK í Allsvenskan, næst efstu deild sænska handknattleiksins, í karlaflokki í gær. Anderstorps SK hefur misst dampinn síðustu vikur og er nú í 12. sæti af 14 liðum deildarinnar. Bjarki gekk til liðs við félagið í sumar en hann lék lengi með HK hér á landi við góðan orðstír.
- Storhamar tapaði fyrir Larvik, 32:26, í norsku úrvalsdeildinni í handknattleik kvenna í gær en leikið var í Larvik. Þetta var aðeins annað tap Storhamar í deildinni í vetur. Axel Stefánsson er annar þjálfara Storhamar sem er áfram í öðru sæti deildarinnar, tveimur stigum á eftir Vipers Kristiansand. Vipers hefur leikið einum leik færra. Larvik er í þriðja sæti tveimur stigum á eftir Storhamar en hefur leikið einu sinni oftar. Gamla brýnið Heidi Løke skoraði fimm mörk fyrir Larvik.
- Nora Mørk skoraði sjö mörk, þar af fjögur úr vítaköstum, þegar danska meistaraliðið Team Esbjerg bætti bikarmeistaratitli í safn sitt í gær með sigri á Nykøbing Falster Håndbold, 36:26, í úrslitaleik bikarkeppninnar í Blue Water Dokken íþróttahöllinni í Esbjerg.
- Besti leikmaður HM kvenna, Henny Reistad, skoraði sex mörk fyrir Esbjerg og þriðja norska landsliðskonan, Sanna Solberg, skoraði fimm mörk. Sænska landsliðskonan Tyra Axnér var markahæst hjá Nykøbing Falster Håndbold með fimm mörk. Axnér er dóttur Tomas Axnér þjálfara sænska kvennalandsliðsins sem tekur við þjálfun Team Esbjerg í sumar þegar Jesper Jensen lætur af störfum.
- Odense Håndbold hreppti bronsverðlaun í dönsku bikarkeppninni með sigri á Viborg HK, 35:32, en alltaf er leikið um bronsverðlaunin.
- Auglýsing -
