- Auglýsing -
- Bjarki Finnbogason og samherjar í Anderstorps halda sæti sínu í næstu efstu deild sænska handknattleiksins, Allsvenskan. Þeir unnu Örebro í oddaleik í umspili deildarinnar, 28:24, á heimavelli í gær. Bjarki,sem lék um árabil með HK hér á landi, sneri til baka í liðið í gær eftir fjarveru í annarri viðureigninni við Örebro. Hann skoraði eitt mark.
- Sveinbjörn Pétursson varð 11 skot, þar af eitt vítakast, í fjögurra marka tapi EHV Aue fyrir TV Großwallstadt á heimavelli í gær, 28:24. Áfram blæs ekki byrlega fyrir EHV Aue-liðinu sem rekur lestina í þýsku 2. deildinni með 10 stig þegar sex umferðir eru eftir. EHV Aue er níu stigum á eftir Dormagen sem er í þriðja neðsta sæti en tvö lið falla úr deildinni að loknum 34 umferðum. Ólafur Stefánsson þjálfar EHV Aue.
- Nordsjælland Håndbold tapaði fyrir Kolding á útivelli, 37:31, í gær í lokaumferð umspilsins í dönsku úrvalsdeildinni í handknattleik karla. Leikurinn var sá síðasti hjá Nordsjælland Håndbold undir stjórn Halldórs Jóhanns Sigfússonar. Hann lætur brátt af störfum hjá félaginu og flytur til Íslands eftir tveggja ára veru í Danmörku.
- Nordsjælland Håndbold slapp við að taka þátt í umspili um sæti í deildinni. Það kemur í hlut TTH Holstebro undir stjórn Arnórs Atlasonar. Stöðuna er að finna hér.
- TTH Holstebro leikur við Skive fH í úrslitaleikjum um sæti um þátttökurétt í úrvalsdeildinni á næstu leiktíð. Skive-liðið vann umspilið í næst efstu deild.
- Væntanlegir andstæðingar Valsmanna í undanúrslitum Evrópubikarkeppninni í handknattleik karla, Minaur Baia Mare, unnu neðsta lið og granna sína í Cluj, 40:30, í 24 umferð rúmensku úrvalsdeildarinnar í handknattleik í gær. Leikið var í Cluj sem er nokkuð sunnan við Baia Mare. Minaur Baia Mare er sem fyrr í 3. sæti deildarinnar, fjórum stigum á eftir Constanta sem er í öðru sæti og 11 stigum framar en Potaissa Turda. Tvær umferðir eru eftir af rúmensku úrvalsdeildinni í karlaflokki.
- Auglýsing -
