- Auglýsing -
- Björgvin Páll Gústavsson markvörður landsliðsins og Vals er einn þeirra sem útilokar ekki að gefa kost á sér í forsetakosningum sem fram fara 1. júní. Svo virðist sem einhver áhugi sé fyrir hendi að Björgvin Páll í það minnsta íhugi framboð. Björgvin Páll sagði frá því á Facebook í gær að hann hafi ekki tekið ákvörðun um framboð. Næstu vikur fari í að einbeita sér að þátttöku með landsliðinu á Evrópumótinu sem hefst eftir tæpar tvær vikur í Þýskalandi.
- Guðni Th. Jóhannesson, forseti Íslands, tilkynnti í áramótaávarpi sínu í gær að hann ætlaði ekki að vera í framboði í kosningum í vor sem fram fara rétt áður en annað kjörtímabil hans rennur sitt skeið á enda.
- Sænski handknattleiksmaðurinn Victor Kløve staldrar aðeins við í eitt tímabil hjá IFK Kristianstad. Hann verður frá og með næsta sumri leikmaður Göppingen og verður þar með einn nýrra manna liðsins eins og landsliðsmaðurinn Ýmir Örn Gíslason. Kløve, sem er aðeins 21 árs gamall, gekk til liðs við IFK Kristianstad síðasta sumar eftir veru hjá Aalborg Håndbold í Danmörku.
- Danski handknattleiksmaðurinn Michael Damgaard hefur framlengt samning sinn við Evrópumeistara SC Magdeburg um eitt ár, fram til ársins 2025. Damgaard, sem er 33 ára gamall, kom til félagsins fyrir níu árum, sumarið 2015.
- Ungverska handknattleiksliðið FTC (Ferencváros) hefur samið við tvo leikmenn heimsmeistaraliðs Frakklands í handknattleik kvenna. Annars vegar Laura Glauser, markvörð, og hinsvegar Orlane Kanor. Báðar leika þær með rúmenskum félagsliðum, CSM Búkarest og Rapid Búkarest. Daninn Allan Heine er þjálfari FTC. Hann tók við starfinu í haust eftir keppnistímabilið hófst. Landi hans Martin Albertsen mátti taka pokann sinn eftir nokkrar vikur í starfi í ljósi slaks árangurs.
- Forráðamenn FTC ætla sér að stokka upp leikmannahópinn í sumar. Auk Frakkanna tveggja hefur verið samið við rússneskar handknattleikskonur um að styrkja leikmannahópinn. Meðal þeirra er Valeria Maslova sem nú leikur með Brest Bretagne í Frakklandi.
- Auglýsing -
