- Auglýsing -
- Petar Cikuša var í gær kallaður inn í spænska landsliðshópinn sem tekur þátt í Ólympíuleikunum í Frakklandi sem hefjast á föstudaginn. Cikuša var allt í öllu í 20 ára landsliði Spánar sem varð Evrópumeistari í Slóveníu á sunnudagskvöldið. Hann var í æfingahópi Spánar í sumar en Jordi Ribera ákvað að Cikuša tæki þátt í EM í stað þess að æfa með A-landsliðinu.
- Ekki var liðinn hálfur sólarhringur frá úrslitaleiknum í Celje á sunnudagskvöld þegar Ribera var búinn að kalla í Cikuša á ný inn í hópinn. Cikuša verður einn þriggja varamanna landsliðsins og því utan 14 manna hópsins sem tekur þátt í upphafi leikanna.
- Handknattleikskonan Lois Abbingh verður annar fánaberi Hollendinga við setningu Ólympíuleikanna í París á föstudaginn. Það þykir mikill heiður og viðurkenning fyrir íþróttamenn að vera fánaberi þjóðar sinnar við setningu Ólympíuleika.
- Vlado Stenzel landsliðsþjálfari Þýskalands í handknattleik karla frá 1974 til 1982 er 90 ára gamall í dag. Hann er lifandi goðsögn í þýskum handknattleik og var þjálfari þýska landsliðsins sem varð heimsmeistari í Danmörku 1978. Stenzel fæddist í Króatíu og var markvörður á sínum yngri árum og lék m.a. með landsliði Júgóslavíu. Hann þótti fara nýjar slóðir sem þjálfari. Undir stjórn Stenzel varð landslið Júgóslavíu Ólympíumeistari í karlaflokki 1972 og vann bronsverðlaun á HM 1970 sem fram fór í Frakklandi.
- Vegna fjölgunar á covidsmitum í Evrópu hefur danska íþróttasambandið óskað eftir því við íþróttamenn sína sem taka þátt í Ólympíuleikunum að forðast hópamyndanir eins og hægt er, halda fjarlægð við viðmælendur og spritta hendur daginn út og inn. M.a. hafa verið settar upp fjöldi handsprittstöðva í þeim hluta Ólympíuþorpsins sem dönsku íþróttamennirnir búa. Ekki verður gerð krafa um grímuskyldu.
- Auglýsing -
