- Auglýsing -
- Dagur Sigurðsson stýrði japanska landsliðinu til sigurs á landsliði Barein, 20:17, í undanúrslitum Asíukeppninnar í handknattleik í gær. Keppnin fer fram í Barein. Aron Kristjánsson er þjálfari landsliðs Barein. Katar lagði Kúveit, 33:26, í hinni viðureign undanúrslita.
- Japan og Katar leika til úrslita á mótinu á morgun. Aron Kristjánsson og Bareinar leika um þriðja sæti við landslið Kúveit. Landsliðin fjögur hafa öll tryggt sér keppnisrétt á HM á næsta ári.
- Erlingur Richardsson og liðsmenn Sádi Arabíu unnu öruggan sigur á Kína, 25:21, í leik um 9. sætið á Asíumótinu í Barein í gær.
- Landslið Alsír, Egyptalands, Grænhöfðaeyja og Túnis eru komin í undanúrslit Afríkukeppninnar í handknattleik karla sem háð er í Kaíró í Egyptalandi. Í undanúrslitum á morgun mætast Egyptaland og Túnis annarsvegar og Alsír og Grænhöfðaeyjar hinsvegar.
- Vilhelm Freyr Steindórsson hefur framlengt samning sinn við handknattleiksdeild Selfoss til 2025. Hann er fjórði leikmaðurinn á skömmum tíma sem framlengir samning sinn við lið félagsins. Vilhelm er þessa stundina að vinna í endurhæfingu eftir aðgerð á mjöðm, en er væntanlegur aftur á parketið von bráðar, segir í tilkynningu handknattleiksdeildar Selfoss í gær.
- Auglýsing -