- Auglýsing -
- Hinn þrautreyndi slóvenski landsliðsmaður og Íslandsvinur, Jure Dolenec, hefur skrifað undir samning við króatíska liðið RK Nexe. Dolenec er tíundi nýi leikmaður liðsins fyrir næstu leiktíð. Dolened hefur leikið með Limoges síðustu þrjú ár en var þar áður í fjögur ár með Barcelona.
- Þýska meistaraliðið SC Magdeburg hefur samið við sænska hornamanninn Isak Persson til eins árs. Hann á hlaupa í skarðið fyrir Tim Hornke sem meiddist í leik með þýska liðinu á Ólympíuleikunum og Svíann Daniel Pettersson sem meiddist með sænska landsliðinu á dögunum.
- Hornke verður frá keppni í hálft ár vegna sinar sem slitnaði í ilinni. Vonir standa til að Pettersson verði frá í styttri tíma.
- Persson er 24 ára gamall hægri hornamaður. Hann var í herbúðum Bergischer HC á síðustu leiktíð en var með lausan samnig við félagið eftir að lið þess féll úr 1. deildinni í vor. Persson hefur sjö sinnum klæðst sænsku landsliðstreyjunni.
- Slóvenska landsliðskonan Valentina Klemencic hefur samið við þýska meistaraliðið HB Ludwigsburg (áður Bietigheim). Klemencic er 22 ára gömul og leikur á línunni. Hún er með slóvenska landsliðinu á Ólympíuleikunum en liðið lauk keppni í gær. Síðustu ár hefur Klemencic leikið með RK Krim Ljubljana.
- Toni Gerona fyrrverandi landsliðsþjálfari Serbíu í handknattleik karla tekur við þjálfun japanska landsliðsins í karlaflokki eftir Ólympíuleikana. Frá þessu segir g-sport.mk í gær samkvæmt heimildum.
- Carlos Ortega tók aðeins tímabundið við þjálfun landsliðs Japans fyrir Ólympíuleikana eftir að Dagur Sigurðsson sagði starfinu lausu í febrúar. Ortega er þjálfari hjá Barcelona en nýtir sumarleyfið til að stýra japanska landsliðinu.
- Gerona, sem er fimmtugur Spánverji, hefur verið án atvinnu síðan í febrúar að honum var sagt upp hjá serbneska sambandinu í kjölfar slaks árangurs karlalandsliðs Serba á Evrópumótinu í Þýskalandi.
- Auglýsing -
