- Auglýsing -
- Kristján Örn Kristjánsson, Donni, var næst markahæstur hjá PAUC í gærkvöld þegar liðið vann Dijon, 33:26, í frönsku 1. deildinni í handknattleik. PAUC er í fimmta sæti með sex stig eftir fjóra leiki. Nimes, Nantes, Montpellier og PSG eru öll taplaus. Nantes, sem Viktor Gísli Hallgrímsson leikur með á leik í dag gegn Limoges á heimavelli.
- Ivry, sem Darri Aronsson er samningsbundinn, tapaði á heimavelli fyrir St. Raphaël, 39:37, á heimavelli. Ivry er í 14. sæti af 16 liðum með eitt stig eftir fjóra leiki. Darri er í endurhæfingu vegna hnémeiðsla og byrjar væntanlega ekki að leika með Ivry fyrr en á nýju ári.
- Grétar Ari Guðjónsson varði þrjú skot þegar lið hans, Sélestat, vann Cherbourg , 28:27, á útivelli í næst efstu deild franska handknattleiksins í gærkvöld. Sélestat situr í fimmta sæti deildarinnar með sex stig að loknum fjórum leikjum.
- Ágúst Elí Björgvinsson varði sex skot, þar af voru þrjú vítaköst, í sjö marka sigurleik Ribe-Esbjerg á lærisveinum Halldórs Jóhanns Sigfússonar í Nordsjælland, 38:31. Ágúst Elí stóð hluta leiksins í markinu á móti Svíanum Niklas Kraft. Elvar Ásgeirsson skoraði eitt mark fyrir Ribe-Esbjerg og átti þrjár stoðsendingar. Ribe-Esbjerg er komið upp í þriðja sæti deildarinnar með átta stig eftir sex leiki. Nordsjælland eitt með tvö stig.
- Sveinn Jóhannsson skoraði sex mörk og var tvisvar vikið af leikvelli þegar lið hans, GWD Minden vann Elbflorenz í Dresden í gær, 32:26, í 2. deild þýska handknattleiksins í gær. Bjarni Ófeigur Valdimarsson var ekki í leikmannahópi GWD Minden sem vann kærkominn sigur eftir þunga byrjun á tímabilinu. Aðalsteinn Eyjólfsson tók við þjálfun GWD Minden í sumar. Liðið er komið með fjögur stig að loknum fimm viðureignum.
- Örn Vésteinsson Östenberg kom lítið við sögu og skoraði ekki mark í fimm marka tapi, 39:34, VfL Lübeck-Schwartau á heimavelli fyrir Dessau-Roßlauer HV 06 í þýsku 2. deildinni í gærkvöld. VfL Lübeck-Schwartau situr engu að síður í 9. sæti deildarinnar með sex stig.
- Tumi Steinn Rúnarsson var ekki í leikmannahópi Coburg í fjögurra marka tapi í heimsókn til Potsdam, 32:28, í 2. deild þýska handknattleiksins í gærkvöld. Nokkuð mun vera um meiðsli í herbúðum Coburg-liðsins sem er um miðja deildina.
Staðan á einni síðu
Nánar er hægt að kynna sér stöðuna í þýska handboltanum og fleiri deildum Evrópu á sérstakri stöðusíðu sem sett hefur verið upp undir flipanum staða og leikir og m.a. má nálgast hér.
- Auglýsing -
