- Auglýsing -
- Kristján Örn Kristjánsson, Donni, lék með PAUC í gærkvöld þegar liðið vann óvæntan sigur á Nantes í frönsku 1. deildinni í handknattleik, 41:37, á heimavelli Nantes. Donni skoraði ekki mark á þeim mínútum sem hann tók þátt.
- Viktor Gísli Hallgrímsson varði 6 skot á þeim 45 mínútum sem hann var í marki Nantes, 17%. Varnarleikur beggja liða var í molum eins og sjá má á úrslitunum. Nantes er í öðru sæti deildarinnar en PAUC er í 8. sæti en stöðuna í frönsku 1. deildinni og í fleiri deildum evrópsks handknattleiks er að finna hér.
- Norska úrvalsdeildarliðið Fjellhammer sagði frá því í gær að það eigi í mjög miklum fjárhagserfiðleikum. Ekki verður hjá því komist að skera verulega niður útgjöld, ekki síst í launakostnaði. Illa hefur gengið hjá Fjellhammer í vetur þó mikið hafi verið lagt undir en m.a. þjálfa Robert Hedin og Glenn Solberg, landsliðsþjálfari Svíþjóðar, liðið í sameiningu. Þeir kosta vafalaust sitt.
- Ásgeir Snær Vignisson gekk til liðs við Fjellhammer í sumar. Liðið er í 11. sæti af 14 mögulegum í norsku úrvalsdeildinni með níu stig að loknum 14 viðureignum.
- Sænski landsliðsmaðurinn Oscar Bergendahl hefur samið á ný við Evrópumeistara SC Magdeburg og verður þar af leiðandi í herbúðum þeirra hið minnsta fram á mitt árið 2026. Bergendahl kom til Magdeburg sumarið 2022 frá GOG í Danmörku hvar hann varð danskur meistari um vorið m.a. með Viktori Gísla Hallgrímssyni landsliðsmarkverði.
- Annar sænskur handknattleiksmaður, Niclas Ekberg, ætlar hinsvegar að flytja heim í sumar frá Þýskalandi. Ekberg hefur verið í með THW Kiel frá 2012. Hann hefur samið við sitt gamla félag, Ystads IF.
- Rúmenska handknattleikskonan Cristina Neagu hefur ákveðið að leika ekki fleiri landsleiki. Hún er 35 ára gömul og hefur í hálfan annan áratug verið burðarás rúmenska landsliðsins og ein fremsta handknattleikskona heims. Neagu er m.a. markahæsti handknattleiksmaður Evrópumóta landslið, hvort heldur er litið til karla eða kvenna. Neagu heldur áfram sínu striki með CSM Búkarest í heimalandinu.
- Auglýsing -
