- Auglýsing -
- Elías Már Halldórsson stýrði Fredrikstad Bkl. til sigurs á Larvik á útivelli í norsku úrvalsdeildinni í handknattleik kvenna í gær, 29:25, eftir að hafa verið þremur mörkum yfir í hálfleik, 15:12. Alexandra Líf Arnarsdóttir lék með Fredrikstad Bkl. að þessu sinni og lét til sín taka í vörninni. Fredrikstad Bkl. er í sjöunda sæti af 12 liðum deildarinnar með 10 stig eftir 11 leiki. Larvik er í þriðja sæti. Meðal leikmanna liðsins er hin gamalreynda norska handknattleikssstjarna Heidi Løke. Hún skoraði fimm mörk í leiknum.
- Fleiri íslenskir þjálfarar voru á sigurbraut utan landsteinanna í gær. Jakob Lárusson fagnaði sigri með kvennaliði Kyndils í fyrsta leik liðsins í færeysku úrvalsdeildinni. Kyndill lagði VÍF frá Vestmanna, 34:26, í Høllinni á Hálsi í Þórshöfn. Kyndill er í öðru sæti deildarinnar með 17 stig eftir 12 leiki og er sex stigum á eftir H71 sem hefur nokkra sérstöðu í deildinni.
- Kristinn Guðmundsson varð að sætta sig við tap með liði sínu EB frá Eiði gegn Stjørnunni á útivelli, 34:24. EB rekur lestina í úrvalsdeild kvenna með tvö stig eftir 11 leiki.
- Siggeir Magnússon þjálfari hjá handknattleiksdeild Stjörnunnar er þjálfari ársins í Garðabæ. Siggeir hefur þjálfað hjá handboltanum í mörg ár ásamt því að sjá um boltaskóla handboltans sem nýtur gríðarlega vinsælda hjá íbúum Garðabæjar. Námskeiðin í boltaskólanum sem hann og kona hans Guðný Gunnsteinsdóttir sjá um á laugardagsmorgnum eru alltaf uppseld og segir það margt um fagmennskuna.
- Á þessu tímabili þjálfar Siggeir 9. flokk kk/kvk ásamt því að vera þjálfari 8. flokks kvenna. Allur undirbúningur, stjórnun æfinga ásamt áhuga hans á þjálfun er til fyrirmyndar enda er hann menntaður íþróttakennari með marga ára reynslu varðandi kennslu og þjálfun, segir í tilkynningu frá handknattleiksdeild Stjörnunnar.
- Klaus-Dieter Petersen fyrrverandi landsliðsmaður Þýskalands greindist með krabbamein fyrr í vetur. Hann er í meðferð við meininu og kveðst vera bjartsýnn um sigur enda hafi meinið fundist snemma við reglubundið lækniseftirlit. Petersen er 54 ára gamall og var m.a. í sigurliði Þjóðverja á EM í Slóveníu fyrir 19 árum. Hann lék lengst af með Kiel og varð m.a. átta sinnum þýskur meistari.
- Auglýsing -
