- Auglýsing -
- Elías Már Halldórsson þjálfari Fredrikstad Bkl. fagnaði sigri í fyrsta leik liðsins í norsku úrvalsdeildinni í kvennaflokki í gær. Fredrikstad Bkl. vann Tertnes, 35:33, á heimavelli.
- Axel Stefánsson er annar tveggja þjálfara Storhamar sem vann stórsigur á Romerike Ravens, 38:20, á útivelli í norsku úrvalsdeild kvenna í gær.
- Grétar Ari Guðjónsson markvörður varði 8 skot í marki Sélestat þann tíma sem hann stóð vaktina í sigri liðsins á US Ivry, 29:25, á heimavelli í 32-liða úrslitum frönsku bikarkeppninnar í gær. Darri Aronsson er frá keppni vegna meiðsla og lék þar af leiðandi ekki með Ivry.
- Kristján Örn Kristjánsson, Donni, og samherjar í PAUC féllu í gær úr leik í 32-liða úrslitum frönsku bikarkeppninnar þegar þeir töpuðu fyrir Tremblay, 27:26.
- Viðureign Villeurbanne og Nantes í 32-liða úrslitum frönsku bikarkeppinnar var frestað. Viktor Gísli Hallgrímsson er markvörður Nantes.
- Berta Rut Harðardóttir og félagar í Kristianstad tryggðu sér sæti í 16-liða úrslitum sænsku bikarkeppninnar í gær með sigri á Höörs HK H 65, 28:22. Berta Rut tók ekki þátt í leiknum en hún gekk til liðs við Kristianstad í sumar og tók þátt í fyrsta leik liðsins í bikarkeppninni í síðustu viku.
- Svartfellski markvörðurinn Mina Mandic sem lék með Aftureldingu í Grill 66-deild kvenna á síðustu leiktíð og Selfoss keppnistímabilið þar á undan hefur fengið félagaskipti til Portúgal eftir því sem fram kemur á félagaskiptaskrá á heimasíðu HSÍ.
- Odense Håndbold vann Esbjerg, 30:25, í Meistarakeppni kvenna í danska handboltanum í gær.
- Í karlaflokki vann GOG lið Aalborg Håndbold, 34:32. Þetta er fyrsti sigur í sögu GOG í meistarakeppninni í Danmörku. Aalborg Håndbold, sem var lengst af með yfirhöndina í leiknum hafði unnið meistarakeppnina fjögur ár í röð.
- Auglýsing -
