- Auglýsing -
- Elín Jóna Þorsteinsdóttir landsliðsmarkvörður og stöllur hennar í EH Aalborg unnu Holstebro örugglega á heimavelli í gær, 33:27, í næsta efstu deild danska handknattleiksins. Því miður hefur reynst ómögulegt að finna tölfræði yfir varin skot í leiknum. EH Aalborg er efst í deildinni með 14 stig að loknum sjö leikjum, fjórum stigum á undan næstu tveimur liðum, Roskilde Håndbold og AGF sem eiga leik inni. Holstebro er í fjórða sæti með átta stig.
- Þýska landsliðið í handknattleik karla, sem Alfreð Gíslason þjálfar, gerði jafntefli við Egypta, 31:31, í fyrri vináttuleik þjóðanna í handknattleik karla í Neu-Ulm í gærkvöld, 31:31. Egyptar voru tveimur mörkum yfir í hálfleik, 18:16.
- Juri Knorr og Timo Kastening skoruðu sex mörk hvor fyrir þýska landsliðið og voru markahæstir. Ahmed Adel skoraði níu mörk fyrir landslið Egyptalands. Síðari vináttuleikurinn fer fram í Ólympíuhöllinni í München á morgun.
- Landslið Brasilíu og Argentínu mætast í dag í úrslitaleik um farseðilinn á Ólympíuleikana næsta sumar og verða þar með fulltrúar Suður- og Mið Ameríku í handknattleikskeppni karla. Forkeppnin hefur staðið yfir í Viña del Mar í Chile síðustu daga.
- Fyrr í vikunni tryggði brasilíska kvennalandsliðið sér sæti á leikunum með sigri á Argentínu í úrslitaleik í forkeppni í kvennaflokki. Karlalið Brasilíu getur fetað í fótspor kvennaliðsins í dag. Bandaríkin og Chile leika um þriðja sætið.
- Túnisbúar gerðu jafntefli við Austurríkismenn í vináttulandsleik í gær, 31:31. Íslenska landsliðið mætir Austurríki í tvígang í vináttuleikjum 6. og 8. janúar ytra, nokkrum dögum áður en lið beggja þjóða hefur keppni á Evrópumeistaramótinu. Portúgal lagði Sviss, 29:26, í vináttuleik í gær, en Austurríki, Portúgal, Sviss og Túnis eru þátttakendur í fjögurra liða móti þessa dagana.
- Auglýsing -
