- Auglýsing -
- Elín Jóna Þorsteinsdóttir landsliðsmarkvörður átti stórleik með EH Aalborg í gærkvöld og var valin besti maður vallarins þegar EH Aalborg vann AGF Håndbold, 33:24, í Nørresundby Idrætscenter í Álaborg. Því miður kemur ekki fram á heimasíðu félagsins hversu mörg skot Elín Jóna varði né hvert prósentuhlutfallið var.
- EH Aalborg hefur gengið allt í hag það sem af er leiktíðar. Liðið er í efsta sæti næst efstu deildar danska handknattleiksins, 18 stig að loknum níu leikjum. EH Aalborg á einn leik eftir áður kemur að hléi vegna heimsmeistaramóts kvenna í handknattleik, gegn Ejstrup Hærvejen á heimavelli á laugardaginn.
- Samningur Ólafs Stefánssonar um þjálfun EHV Aue gildir fram á næsta ári. Mikil eftirvænting ríkir vegna komu Ólafs til félagsins sem fékk mikla athygli í þýskum fjölmiðlum í gær. EHV Aue er ekki daglega í þýsku fjölmiðlum en fékk óvænt hlut sviðsljóssins í gær vegna samningsins við Ólafs sem skiljanlega er mjög þekktur innan handknattleiks fjölskyldunnar í Þýskalandi. „Nei, það er ekki fyrsti apríl,“ sagði m.a. í frétt á Facebook-síðu Aue í gær.
- Danski handknattleiksmaðurinn Hans Lindberg segir alveg öruggt að hann haldi heim til Danmerkur næsta sumar og gangi til liðs við uppeldisfélag sitt, HØJ Elite á Sjálandi. Lindberg er 42 ára gamall og hefur leikið í 17 ár með félagsliðum í Þýskalandi með frábærum árangri. Hann er m.a. markahæsti leikmaður í sögu þýsku 1. deildarinnar. Til stóð að Lindberg flytti heim í sumar sem leið en forráðamenn Füchse Berlin vendu kvæði sínu í kross og buðu Lindberg mjög góðan samning í vor, nokkrum mánuðum eftir að þeir höfðu tilkynnt Dananum að hann fengi ekki nýjan samning.
- Franska landsliðskonan Estelle Nze Minko hefur skrifað undir nýjan þriggja ára samning við Györ Audi ETO KC með möguleika á að bæta fjórða árinu við. Minko hefur verið í herbúðum ungverska stórliðsins frá 2019. Hún verður í franska landsliðinu sem mætir íslenska landsliðinu á HM 2. desember.
- Auglýsing -
