- Auglýsing -
- Elín Jóna Þorsteinsdóttir og samherjar hennar í EH Aalborg unnu Roskilde Håndbold, 32:26, í 18. umferð næst efstu deildar danska handknattleiksins í gær. EH Aalborg er lang efst í deildinni með 34 stig eftir 18 leiki, sjö stigum á undan Roskilde Håndbold sem er í öðru sæti.
- Orri Freyr Þorkelsson skoraði eitt mark fyrir Sporting þegar liðið vann Póvoa AC Bodegão, 32:28, á heimavelli í portúgölsku 1. deildinni í handknattleik í gær. Sporting er í efsta sæti taplaust eftir 18 umferðir.
- Bjarki Már Elísson skoraði þrjú mörk fyrir Telekom Veszprém í 13 marka sigri á PLER-Budapest, 36:23, í ungversku 1. deildinni í gær. Leikurinn fór fram í Búdapest. Telekom Veszprém er í efsta sæti taplaust eftir 16 umferðir.
- Alpla Hard, liðið sem Hannes Jón Jónsson þjálfar, er komið í átta liða úrslit í austurrísku bikarkeppninni eftir sigur á Linz í framlengdum leik á útivelli í gær, 33:30.
- Haukur Þrastarson skoraði þrjú mörk og var tvisvar vikið af leikvelli þegar Industria Kielce vann Arged Rebud Ostrovia, 37:23, í pólsku úrvalsdeildinni í handknattleik í gær. Industria Kielce er áfram í öðru sæti deildarinnar en Wisla Plock er efst og taplaust eftir 21 umferð.
- Óðinn Þór Ríkharðsson skoraði þrjú mörk, þar af tvö úr vítaköstum, í þriggja marka sigri Kadetten Schaffhausen á GC Amicitia Zürich, 33:30, á heimavelli í gær í svissnesku A-deildinni í handknattleik. Kadetten Schaffhausen hefur áfram talsverða yfirburði í deildinni.
- Harpa Rut Jónsdóttir skoraði ekki mark þegar GC Amicitia Zürich gerði jafntefli við LC Brühl Handball, 28:28, á útivelli í svissnesku A-deildinni í handknattleik á útivelli. Harpa og liðsmenn GC Amicitia Zürich eru í þriðja sæti í sex liða keppni liðanna sem voru í efri hluta deildarinnar áður en henni var skipt upp í tvö hluta fyrir skemmstu á öðru stigi mótsins.
- Arnar Birkir Hálfdánsson skoraði tvisvar sinnum í þriggja marka sigri Amo HK á HF Karlskrona, 30:27, á heimavelli Amo í gær. Leikurinn var liður í sænsku úrvalsdeildinni og var uppgjör liða sem voru jöfn að stigum eftir 20 leiki. Dagur Sverrir Kristjánsson skoraði þrjú mörk fyrir Karlskona og Þorgils Jón Svölu Baldursson skoraði eitt. Ólafur Andrés Guðmundsson var ekki í leikmannahópi Karlskrona að þessu sinni. Phil Döhler stóð nær allan leikinn í marki liðsins og varði 10 skot, 26%.
- Örn Vésteinsson Östenberg náði ekki að skora fyrir VfL Lübeck-Schwartau þegar liðið vann EHV Aue, 32:22, í 2. deild þýska handknattleiksins í gær. Ólafur Stefánsson er þjálfari EHV Aue sem sem rekur lestina í deildinni. Sveinbjörn Pétursson stóð meirihluta leiksins í marki EHV Aue og varði átta skot, þar af eitt vítakast, 28%. VfL Lübeck-Schwartau er í sjöunda sæti deildarinnar næst á eftir tveimur Íslendingaliðum, Coburg og Hagen.
- Bjarki Finnbogason skoraði tvö mörk fyrir SK Anderstorps þegar liðið tapaði með eins marks mun fyrir Tyresö, 32:31, í næst efstu deild sænska handknattleiksins í gær. Leikurinn fór fram í Tyeseö. Anderstorps er 10. sæti af 14 liðum deildarinnar þegar fjórar umferðir eru óleiknar.
- Auglýsing -
