- Auglýsing -
- Elvar Örn Jónsson skoraði fimm mörk og var einu sinni vikið af leikvelli í tvær mínútur þegar lið hans MT Melsungen vann Bergischer HC, 31:26, á heimavelli í þýsku 1. deildinni í handknattleik í gærkvöld. Arnar Freyr Arnarsson skoraði tvö mörk MT Melsungen sem fór upp í fjórða sæti með þessum sigri.
- Arnór Þór Gunnarsson er aðstoðarþjálfari Bergischer HC sem situr í 16. og þriðja neðsta sæti þýsku 1. deildarinnar stigi á eftir HSV Hamburg sem tapaði fyrir Erlangen í gær, 30:28.
- Viktor Gísli Hallgrímsson varði 11 skot, 26%, í fjögurra marka sigri Nantes, 35:31, á Saint-Raphaël á heimavelli í frönsku 1. deildinni í handknattleik í gær. Nantes er í öðru sæti deildarinnar með 29 stig að loknum 17 leikjum. PSG er efst með 32 stig eftir 16 leiki. Montpellier er í þriðja sæti með 25 stig.
- Grétar Ari Guðjónsson markvörður og samherjar hans í Sélestat töpuðu fyrir Cherbourg á heimavelli í 2. deild franska handknattleiksins í gærkvöld, 28:31. Grétar Ari varði þrjú skot í leiknum. Sélestat er í þriðja sæti deildarinnar með 23 stig eftir 17 leiki, tveimur stigum á eftir Pontault sem er í öðru sæti. Tremblay er efst með 32 stig.
- Áhorfendum var boðið upp á markaveislu í Drammenshallen í gærkvöld þegar Drammen vann Fjellhammer í úrvalsdeild karla í handknattleik, 45:25. Fjörutíu mörk voru skoruð í fyrri hálfleik. Af þeim skoruðu leikmenn Drammen 25. Róbert Sigurðarson skoraði eitt mark fyrir Drammen og var einu sinni vikið af leikvelli. Hinn hálf íslenski Viktor Petersen Norberg skoraði átta mörk fyrir Drammen og var einu sinni vikið af leikvelli í tvær mínútur. Drammen er í fjórða sæti norsku úrvalsdeildarinnar með 27 stig eftir 19 leiki, er stigi á eftir Arendal.
- IK Sävehof heldur efsta sæti sænsku úrvalsdeildarinnar í karlaflokki. Liðið vann Skövde, 30:29, á heimavelli í gærkvöld. Tryggvi Þórisson skoraði ekki mark fyrir Sävehof að þessu sinni. Stöðuna í sænsku úrvalsdeildinni og í fleiri deildum í evrópskum handknattleik er að finna hér.
- Auglýsing -
