- Auglýsing -
- Elvar Örn Jónsson skoraði fimm mörk, átti þrjár stoðsendingar og var einu sinni vikið af leikvelli í tvær mínútur þegar lið hans Melsungen vann Eisenach, 27:24, á útivelli í þýsku 1. deildinni í handknattleik í gær. Arnar Freyr Arnarsson skoraði eitt mark fyrir Melsungen sem fór í efsta sæti deildarinnar með sigrinum. Melsungen hefur 22 stig að loknum 14 leikjum, stigi ofar en Magdeburg og Füchse Berlin sem hafa aðeins lokið 12 leikjum. Stöðuna í heild er að finna hér.
- Bjarni Ófeigur Valdimarsson skoraði sex mörk og Sveinn Jóhannsson fjögur í naumu tapi liðs þeirra, GWD Minden, á heimavelli fyrir TV Großwallstadt, 30:29, í 2. deild þýska handknattleiksins í gær. Minden átti síðustu sókn leiksins en samkvæmt textalýsingu frá leiknum tapaði Bjarni Ófeigur boltanum á síðustu sekúndu. Aðalsteinn Eyjólfsson er þjálfari GWD Minden sem situr í 15. sæti af 18 liðum deildarinnar með 9 stig eftir 13 leiki. Stöðuna er að finna hér.
- Fredericia HK, liðið sem Guðmundur Þórður Guðmundsson þjálfar og Einar Þorsteinn Ólafsson leikur með, vann Nordsjælland, 33:28, í dönsku úrvalsdeildinni í gærkvöld. Halldór Jóhann Sigfússon er þjálfari Nordsjælland. Fredericia hafði talsverða yfirburði í síðari hálfleik og var mest 11 mörkum yfir. Fredericia situr áfram í öðru sæti deildarinnar en Nordsjælland, sem hefur hvað minnsta á milli fjárhagslegra handa af liðum deildarinnar, er í 10. sæti af 14 með 10 stig að loknum 14 leikjum. Stöðuna í dönsku úrvalsdeildinni er annars að finna hér.
- Tryggvi Þórisson skoraði eitt mark fyrir Sävehof þegar liðið vann IF Hallby HK, 34:30, á útivelli í sænsku úrvalsdeildinni í gær. Sävehof er efst í deildinni með 16 stig eins og Hammarby.
- Þorgrímur Smári Ólafsson fyrrverandi handknattleiksmaður hjá Fram og fleiri liðum hefur verið ráðinn framkvæmdastjóri aðalstjórnar Fram. Hann hefur störf í upphafi næsta árs. Þorgrímur þekkir vel til félagsins því auk þess að leika með liði þess var hann rekstrarstjóri handknattleiksdeildar í tæp 4 ár.
- Auglýsing -
