- Auglýsing -
- Handknattleiksmaðurinn Friðrik Hólm Jónsson hefur gengið til liðs við Selfoss á samningi út þetta keppnistímabil. Friðrik kemur til Selfoss frá ÍBV þar sem hann er uppalinn. Hann er vinstri hornamaður. Friðrik lék með ÍR á síðustu leiktíð en gekk á ný til liðs við ÍBV á síðasta sumri og hefur leikið fimm leiki fyrir Eyjaliðið á yfirstandandi leiktíð.
- Handknattleikssamband Evrópu, EHF, og þýska handknattleikssambandið sendu HSÍ síðdegis í gær afsökunarbeiðni vegna mistaka sem urðu þegar leika átti þjóðsöng Íslands fyrir viðureign Þýskalands og Íslands á Evrópumótinu í handknattleik karla í fyrrakvöld. Um var að ræða tæknileg mistök. Málinu er þar með lokið af hálfu HSÍ.
- Spánverjinn Toni Gerona hefur verið leystur frá störfum landsliðsþjálfara Serbíu í handknattleik karla. Ástæðan er slakur árangur serbneska landsliðsins á Evrópumótinu. Serbar ráku lestina í C-riðli sem leikinn var í München. Var það langt frá markmiðum sínum sem var að tryggja sér þátttökurétt í forkeppni Ólympíuleikanna sem fram fer í mars. Gerona var í starfi í 42 mánuði, lengur en nokkur annar landsliðsþjálfari serbneska karlalandsliðsins á öldinni.
- Sænsk/íslenska handknattleikskonan Kristín Þorleifsdóttir hefur samið við ungverska liðið DVSC Schaeffler frá borginni Debrecen. Liðið leikur m.a. í Meistaradeild Evrópu. Kristín er sænsk landsliðskona. Foreldrar hennar er Íslendingar en þau hafa búið um árabil í Svíþjóð þar sem Kristín er alin upp. Hún hefur leikið með Randers og Horsens í dönsku úrvalsdeildinni síðustu árin.
- Auglýsing -
