- Auglýsing -
- Grétar Ari Guðjónsson varði átta skot, þar af tvö vítaköst, þegar lið hans Sélestat vann Massy, 31:26, í næst efstu deild franska handknattleiksins í gærkvöld. Grétar Ari lék aðeins hluta leiksins því hann var með hlutfallsmarkvörslu upp á 42%. Sélestat er í fjórða sæti deildarinnar með 28 stig þegar 22 umferðir af 30 eru að baki. Eftir lokaumferðina tekur við umspil um sæti í efstu deild. Grétar Ari kveður Sélestat í sumar og gengur til liðs við US Ivry í efstu deild.
- Nantes vann PAUC, 30:24, í 1. deild franska handknattleiksins í gærkvöld. Hvorki Viktor Gísli Hallgrímsson né Kristján Örn Kristjánsson, Donni, léku með liðunum tveimur að þessu sinni en þeir eru að jafna sig af meiðslum. Nantes er sem fyrr í öðru sæti deildarinnar en PAUC situr í níunda sæti.
- Færeyski landsliðsmarkvörðurinn Pauli Jacobsen verður að leika með hlífðargleraugu eftir að hann fékk þungt högg á hægra augað á æfingu hjá danska liðinu HØJ fyrir fáeinum vikum. Rifa kom á sjónhimnu og hugsanlega mun Jacobsen, sem er 21 árs, bera langvarandi skaða af. Frá þessi er sagt í portal.fo og að það skýrist á næstu þremur til sex vikum hvort sá skaði sem varð á auganum gangi til baka að einhverju eða öllu leyti.
- Sænski handknattleiksmaðurinn Lukas Nilsson hefur skrifað undir nýjan þriggja ára samning við Aalborg Håndbold. Hann kom til félagsins á síðasta sumri og gerði þá tveggja ára samning. Slík lukka er með samstarfið að Svíinn ákvað að skrifa strax undir nýjan samning í stað þess fyrri sem átti að gilda til ársins 2025.
- Rúnar Sigtryggsson þjálfari SC DHfK Leipzig hefur krækt í serbneska línumanninn Luka Rogan frá serbneska meistaraliðinu RK Vojvodina. Rogan kemur til þýska liðsins í sumar á tveggja ára samningi. Rogan var í sigurliði RK Vojvodina í Evrópubikarkeppninni á síðasta vori og lék með liðinu í Evrópudeildinni í vetur. RK Vojvodina féll úr leik eftir 16-liða úrslit. Rogan var einnig í U21 árs landsliði Serba sem tapaði fyrir íslenska landsliðinu í bronsleiknum á HM á síðasta sumri.
- Spænski handknattleiksmaðurinn Eduardo Gurbindo kveður þýska liðið THW Kiel í sumar og gengur til liðs við Besiktas í Tyrklandi.
- Auglýsing -
