- Auglýsing -
- Sebastian Frandsen átti enn einn stórleikinn í marki Fredericia í gær þegar liðið lagði Bjerringbro/Silkeborg, 31:24, í dönsku úrvalsdeildinni í handknattleik. Frandsen varði 16 skot, þar af tvö vítaköst, sem lagði sig út í 46% hlutfallsmarkvörslu. Einar Þorsteinn Ólafsson er leikmaður Fredericia.
- Guðmundur Þórður Guðmundsson er sem fyrr þjálfari Fredericia sem nú er í öðru sæti úrvalsdeildar með 19 stig að loknum 13 leikjum, einu stigi fyrir ofan Mors-Thy en fimm stigum á eftir toppliði Aalborg sem á einnig leik til góða. Stöðuna í dönsku úrvalsdeildinni og fleiri deildum í evrópskum handknattleik er að finna hér.
- Sigvaldi Björn Guðjónsson skoraði þrjú mörk, þar af eitt úr vítakasti, og var einu sinni vikið af leikvelli þegar Kolstad vann öruggan sigur á Haslum, 31:23, í norsku úrvalsdeildinni í handknattleik í gær. Kolstad tók öll völd á leikvellinum í síðari hálfleik eftir að hafa verið marki undir að fyrri hálfleik loknum, 15:14.
- Kolstad er efst í deildinni með 19 stig eftir 11 leiki, stigi á undan Elverum sem vann Sandnes, 37:28. Stöðuna í norsku úrvalsdeildinni og í fleiri deildum Evrópu er að finna hér.
- Berta Rut Harðardóttir skoraði fjögur mörk og gaf fjórar stoðsendingar þegar lið hennar, Kristianstad HK tapaði fyrir Västeråsirsta, 26:21, á heimavelli í 9. umferð sænsku úrvalsdeildarinnar í handknattleik í gær. Kristianstad HK er í fimmta sæti með 10 stig að loknum níu leikjum.
- Örn Vésteinsson Östenberg skoraði þrjú mörk og átti eina stoðsendingu þegar VfL Lübeck-Schwartau gerði jafntefli við Bayer Dormagen, 29:29, á heimavelli í 2. deild þýska handknattleiksins í gær. Erni var einu sinni vikið af leikvelli. VfL Lübeck-Schwartau er í 12. sæti af 18 liðum deildarinnar með 11 stig eftir 12 leiki.
- Eftir því sem næst verður komist skoraði Haukur Þrastarson ekki mark fyrir Industria Kielce vann KPR Legionowo, 39:32, á heimavelli í pólsku úrvalsdeildinni í gær. Stöðuna í pólsku úrvalsdeildinni og í fleiri deildum Evrópu er að finna hér.
- Alpla Hard, sem Hannes Jón Jónsson þjálfar, gerði jafntefli við Bregenz í grannaslag í austurrísku 1. deildinni í handknattleik í gær, 29:29. Alpla situr í þriðja sæti deildarinnar með 14 stig eftir níu leiki, er tveimur stigum á eftir Füchse sem er efst. Krems, sem ÍBV, mætir um næstu helgi í 32-liða úrslitum Evrópubikarkeppninnar situr í 7. sæti með átta stig.
- Auglýsing -
