- Auglýsing -
- Fredericia HK, sem Guðmundur Þórður Guðmundsson þjálfar, vann í gær nauðsynlegan sigur til að halda í vonina um sæti í undanúrslitum úrslitakeppninnar um danska meistaratitilinn. Fredericia HK vann GOG á útivelli, 29:27, eftir að hafa verið undir, 13:10, að loknum fyrri hálfleik. Síðari hálfleikurinn var frábær hjá Fredericia HK sem hefur nú fjögur stig eftir þrjá leiki í riðli tvö í úrslitakeppninni. Fjögur lið eru í hvorum riðli. Skjern er efst með fjögur stig eftir tvo leiki. GOG er með þrjú stig og Ringsted tvö.
- Einar Þorsteinn Ólafsson lék að vanda með Fredericia HK. Leikið var í Phønix Tag Arena í Gudme sem rúmar aðeins tæplega 2.000 áhorfendur. Uppselt var á leikinn. Kurr var á meðal stuðningsmanna Fredericia HK vegna miðaverðs á leikinn en hver þeirra kostaði 250 dkr, eða sem nemur rúmlega 5.000 íslenskra króna. Miðaverð á heimaleiki Fredericia HK er helmingi lægra.
- Stöðuna í úrslitakeppninni, eftri og neðri hluta, er að finna hér.
- Alpla Hard gerði jafntefli við Füchse, 31:31, í síðasta leik liðanna í austurrísku 1. deildinni í gær. Hannes Jón Jónsson er þjálfari Alpla sem situr í efsta sæti deildarinnar. Þó er ekki víst að svo verði þegar upp verður staðið. Handball Tirol er jafnt Hard að stigum en á síðasta leikinn eftir gegn Aon Fivers á útivelli í dag. Stöðuna er að finna hér.
- Viktor Gísli Hallgrímsson er ennþá frá keppni vegna meiðsla. Lið hans, Nantes, vann Créteil, 38:31, á heimavelli í gærkvöld í 24. umferð frönsku 1. deildarinnar í handknattleik. Nantes er í öðru sæti deildarinnar, þremur stigum á eftir PSG, þegar sex umferðir eru eftir. Stöðuna er að finna hér.
- Kristján Örn Kristjánsson, Donni, og Darri Aronsson voru báðir fjarverandi vegna meiðsla þegar lið þeirra, PAUC og US Ivry, áttust við í Aix í gærkvöld í frönsku 1. deildinni í handknattleik. PAUC vann með eins marks mun, 38:37. PAUC er um miðja deild en US Ivry situr í 13. sæti af 16 liðum með 14 stig. Créteil og Dijon reka lestina en tvö lið falla úr deildinni þegar keppni lýkur síðla í lok maí.
- Grétar Ari Guðjónsson kom lítið við sögu í stórsigri Sélestat á Sarrebourg, 37:23, í frönsku 2. deildinni í gærkvöld. Leikurinn fór fram í Sélestat sem er í fjórða sæti deildarinnar.
- Auglýsing -
