- Auglýsing -
- Lærisveinar Halldórs Jóhanns Sigfússonar í danska úrvalsdeildarliðinu Nordsjælland náðu einu mikilvægu stigi í botnbaráttu dönsku úrvalsdeildarinnar í gærkvöld þegar þeir skildu með skiptan hlut í viðureign við Ringsted, 31:31. Leikurinn markaði loka 21. umferðar deildarinnar og fór hann fram í Royal Stage Arena Hillerød að viðstöddum 2.197 áhorfendum.
- Leikurinn dróst mjög á langinn því rafmagn fór af keppnishöllinni í fyrri hálfleik, í stöðunni 5:7, og var gert nærri klukkustundarhlé meðan rafmagni var komið á aftur. Áhorfendum var gert að yfirgefa keppnishöllina meðan unnið var að viðgerð. Um tíma stóð til að fresta leiknum en um síðir komst rafmagn á. Áhorfendum hefur verið boðið að nýta aðgöngumiða kvöldsins á næsta heimaleik Nordsjælland gegn Skanderborg AGF.
- Norska handknattleikskonan Linn Sulland hefur tekið fram handboltaskóna á nýjan leik, þremur árum eftir að hún lagði þá á hilluna í geymslunni eftir frábæran feril 36 ára gömul. Sulland hefur tekið upp þráðinn með Oppsal í Osló. Hún hefur undanfarin tvö ár verið þrekþjálfari hjá liðinu en langaði til að prófa að spila á ný og er sátt með hvernig gengur. Sulland lék á sínum tíma 193 landsleiki og skoraði í þeim 579 mörk. Sulland varð Evrópumeistari með Vipers vorið 2021 áður hún lét gott heita, í bili.
- Franski handknattleiksmaðurinn Benjamin Richert skoraði 19 mörk í 25 skotum þegar lið hans Chambéry vann Créteil, 40:39, í frönsku 1. deildinni í handknattleik á sunnudaginn. Richert setti þar með markamet í einum leik í frönsku 1. deildinni. Gamla metið átti Anouar Ayed sem skorað 17 mörk í 17 skotum fyrir Toulouse 2004 sem hreint ótrúlegt afrek. Raphaël Caucheteux jafnaði metið 2017 með 17 mörkum í 19 skotum fyrir Saint-Raphaël. Íslandsvinurinn Frédéric Volle skoraði 16 mörk leiktíðina 1995/1996 í leik með OM Vitrolles.
- Auglýsing -
