- Auglýsing -
- Mikkel Hansen lék í fyrsta sinn í gær með Aalborg eftir sex vikna fjarveru í bikarleik við smáliðið Skive. Hansen hefur glímt við meiðsli hné en liðþófi mun hafa gert honum gramt í geði. Hansen verður væntanlega kominn í gott form þegar Álaborgarliðið leikur í átta liða úrslitum Meistaradeildarinnar við Veszprém upp úr mánaðamótum.
- Roberto Garcia Parrondo þjálfari þýska liðsins MT Melsungen sem Arnar Freyr Arnarsson og Elvar Örn Jónsson leika með, hefur skrifað undir nýjan þriggja ára samning við félagið. Parrondo tók við þjálfun Melsungen eftir að Guðmundur Þórður Guðmundsson hætti haustið 2021.
- Í gær staðfesti þýska handknattleiksliðið Rhein-Neckar Löwen að þýski landsliðsmaðurinn Juri Knorr yfirgefi félagið sumarið 2025, ári áður en samningur hans á að renna út. Knorr óskaði eftir að fá að nýta uppsagnarákvæði í samningnum á næsta ári og féllst félagið á það. Nokkuð er síðan að það spurðist út að danska úrvalsdeildarliðið Aalborg Håndbold hafi borið víurnar í Knorr og hugsi hann sem eftirmann Mikkel Hansen sem hættir í sumar.
- Knorr, sem verður 24 ára hinn 9. maí, kom til Rhein-Neckar Löwen fyrir þremur árum frá GWD Minden.
- Bojana Popovic sem verið hefur landsliðsþjálfari Svartfjallands í handknattleik kvenna undanfarin þrjú ár mun að öllum líkindum hætta á næstunni. Popovic varð ásamt fleirum fyrir vonbrigðum með að landsliðinu tókst ekki að tryggja sér farseðilinn á Ólympíuleikana um síðustu helgi. Samhliða starfi sem landsliðsþjálfari er Popovic þjálfari Buducnost sem unnið hefur meistaratitilinn í handknattleik kvenna mörg síðustu ár í Svartfjallalandi. Popovic segist vera búin að fá nóg af því að þjálfa bæði félagslið og landslið á sama tíma.
- Auglýsing -
