- Auglýsing -
- Haukur Þrastarson skoraði fimm mörk fyrir Industria Kielce þegar liðið vann MMTS Kwidzyn, 35:24, í pólsku úrvalsdeildinni í handknattleik í gær á heimavelli. Industria Kielce er sem fyrr þremur stigum á eftir Wisla Plock í öðru sæti deildarinnar.
- Óðinn Þór Ríkharðsson skoraði ekki mark þegar Kadetten Schaffhausen vann HC Kriens-Luzern, 36:33, í svissnesku A-deildinni í handknattleik í gær. Þar með hefur Kadetten Schaffhausen tíu stiga forskot í efsta sæti deildarinnar, 45 stig eftir 25 leiki. HC Kriens er í öðru sæti.
- Örn Vésteinsson Östenberg skoraði ekki fyrir VfL Lübeck-Schwartau þegar liðið vann SG BBM Bietigheim, 28:24, í 2. deild þýska handknattleiksins á heimavelli í gær.
- Sveinbjörn Pétursson varði þrjú skot, þar af eitt vítakast, þegar EHV Aue steinlá á útivelli fyrir TV 05/07 Hüttenberg, 37:25, í þýsku 2. deildinni í gær. Ólafur Stefánsson er þjálfari EHV Aue sem áfram rekur lestina í deildinni.
- Hannes Jón Jónsson og lærisveinar hans í Alpla Hard töpuðu á útivelli í gær fyrir Ferlach, 33:30, í austurrísku 1. deildinni í handknattleik. Alpla Hard er í öðru sæti með 27 stig eftir 18 leiki, þremur stigum á eftir efsta liðinu, Handball Tirol. Füchse er í þriðja sæti, einu stigi á eftir Hard.
- Bjarki Finnbogason skoraði ekki fyrir Anderstorps SK í gær þegar liðið tapaði fyrir HK Varberg, 33:20, á útivelli í Allsvenskan, næstu efstu deild sænska handknattleiksins. Anderstorps SK féll niður í neðsta sæti deildarinnar eftir leiki 24. umferðar í gær þar sem liðin á næstu grösum náðu öll að krækja í stig í leikjum sínum. Tvær umferðir eru eftir í Allsvenskan. Tvö neðstu liðin falla úr deildinni og tvö þau næstu fyrir ofan taka sæti í umspili.
- Auglýsing -
