- Auglýsing -
- Haukur Þrastarson var í leikmannahópi Industria Kielce í gær þegar liðið tapaði fyrsta úrslitaleiknum við Wisla Plock um pólska meistaratitilinn í handknattleik karla í gær, 24:23. Vítakeppni þurfti til að knýja fram hrein úrslit á annan hvorn veginn. Haukur skoraði ekki mark í leiknum.
- Næsta viðureign liðanna fer fram á heimavelli Industria Kielce á sunnudaginn. Þess má geta að Kielce hefur unnið pólska meistaratitilinn tólf ár í röð.
- Sveinbjörn Pétursson stóð í marki EHV Aue annan hálfleikinn í gær þegar liðið tapaði fyrir Bietigheim, 41:29, í 2. deild þýska handknattleiksins í gær. Sveinbjörn varði tvö skot á þessum tíma. EHV Aue rekur lestina og bíður fall í 3. deild þegar deildarkeppnin verður gerð upp um mánaðamótin. Ólafur Stefánsson stýrir liðinu til loka keppnistímabilsins. Bietigheim mun á hinn bóginn fylgja í kjölfar Potsdam upp í 1. deild á næstu leiktíð eins og sjá má m.a. í stöðunni sem er finna hér.
- Hollenski landsliðsmaðurinn Kay Smits er byrjaður að æfa á nýjan leik af fullum krafti. Smits hefur verið frá keppni síðan í desember vegna hjartsláttartruflana sem illa gekk að ráða við. Ef fram heldur sem horfir hjá Smits kemur hann að nýju af krafti inn í lið Flensburg í upphafi næsta keppnistímabils.
- Í framhaldi af því að forráðamenn Celje Lasko sögðu þjálfaranum Alem Toskic upp störfum hafa þeir birt auglýsingu eftir nýjum þjálfara á samfélagsmiðlasíðunni LinkedIn. Þykir þetta var nýstárlegt að hálfu félagsins. Celje, sem lengi hefur verið annað af tveimur bestu karlalaliðum Slóveníu í handknattleik, hafnaði í þriðja sæti í deildinni í vetur. Þykir það með öllu óviðunandi innan félagsins. Þess vegna er þess freistað að fá inn ferska vinda með því að auglýsa eftir þjálfara.
- Auglýsing -
