- Auglýsing -
- Sunnudaginn 27. ágúst verður haustfundur handknattleiksdómara haldinn í Laugardal. Á dagskrá verður m.a. þrekpróf, leikreglufyrirlestur, gestafyrirlesari, leikreglupróf, segir í tilkynningu sem barst til handbolta.is.
- Því var lætt að handbolta.is í gær að Einar Þorsteinn Ólafsson leikmaður danska úrvalsdeildarliðsins Fredericia HK væri meiddur á öxl og hafi verið og verði áfram frá keppni í einhverjar vikur til viðbótar. Keppni í dönsku úrvalsdeildinni hefst upp úr næstu mánaðamótum.
- Tryggvi Þórisson skoraði eitt mark þegar lið hans Sävehof vann GF Kroppskultur, 36:29, í annarri umferð sænsku bikarkeppninnar í handknattleik í gærkvöld. Sävehof hefur þar með unnið tvo fyrstu leiki sína í riðlakeppni bikarkeppninnar og er öruggt um sæti í 16-liða úrslitum keppninnar.
- Ribe-Esbjerg, sem þeir Ágúst Elí Björgvinsson og Elvar Ásgeirsson leika með, tapaði í gær fyrir Mors-Thy í síðasta æfingaleik liðsins á undirbúningstímabilinu fyrir þátttöku í dönsku úrvalsdeildinni sem hefst um mánaðarmótin. Engum sögum fer af þátttöku Ágústs og Elvars í leiknum.
- Keppnistímabilið í handknattleiknum í Þýskalandi hefst í kvöld með leik meistara síðasta tímabils í karlaflokki, THW Kiel og Rhein-Neckar Löwen. Arnór Snær Óskarsson og Ýmir Örn Gíslason verða í eldlínunni með síðarnefnda liðinu.
- Eins hefst keppni í dönsku bikarkeppninni í dag. Reyndar er þráðurinn tekinn upp í 16-liða úrslitum en þaðan var frá horfið í byrjun sumars. Elín Jóna Þorsteinsdóttir landsliðsmarkvörður verður væntanlega í eldlínunni með nýjum samherjum í EH Aalborg.
- Auglýsing -
