- Auglýsing -
- Hrannar Ingi Jóhannsson leikmaður ÍR var úrskurðaður í eins leiks bann á fundi aganefndar HSÍ í fyrradag. Hrannar Ingi hlaut útilokun með skýrslu í leik ÍR og Fram U í Grill 66-deild karla 17. febrúar. Hrannar verður þar af leiðandi ekki með ÍR í heimsókn til Þórs í Höllina á Akureyri á laugardaginn.
- Þráinn Orri Jónsson leikmaður Hauka og Tryggvi Sigurberg Traustason leikmaður Selfoss sem fengu útilokun í kappleikjum í síðustu viku sleppa við leikbann. Athygli beggja er vakin á að þeir verða að halda sig á mottunni sökum þess að ítrekaðar útilokanir geta leitt til leikbanna.
- Ægir Örn Sigurgeirsson starfsmaður Hauka hlaut útilokun með skýrslu vegna mjög grófrar ódrengilegrar hegðunar í leik Hauka og Stjörnunnar í 4.flokki kvenna þann 14.02.2024. Dómarar meta að brotið falli undir reglu 8:10 a). Er það mat aganefndar að brotið kunni að verðskulda lengra bann en einn leik og var málinu frestað um sólarhring til að gefa félaginu færi á að skila athugasemdum sínum til skrifstofu HSÍ, segir í fundargerð aganefndar HSÍ.
- Guðmundur Þórður Guðmundsson og liðsmenn hans í Fredericia HK unnu KIF Kolding, 27:26, í dönsku úrvalsdeildinni í handknattleik í gær. Leikurinn fór fram í Sydbank Arena í Kolding. Einar Þorsteinn Ólafsson leikur með Fredericia sem er í öðru sæti deildarinnar með 34 stig að loknum 22 leikjum. Liðið er þremur stigum á eftir Aalborg Håndbold sem er efst og sex stigum á undan Bjerringbro/Silkeborg sem er í þriðja sæti. Hægt er að skoða stöðuna í dönsku úrvalsdeildinni og í fleiri deildum ervrópsks handknattleiks með því að smella hér.
- Sænski markvörðurinn Mikael Appelgren leikur ekki með Rhein-Neckar Löwen næstu vikurnar eftir að hafa meiðst. Appelgren er þriðji á lista markvarða í þýsku 1. deildinni í vetur sem varið hefur hlutfallslega flest skot, 32,65%. Fyrir ofan hann eru Kevin Møller hjá Flensburg og Sergej Hernandez markvörður Magdeburg.
- Auglýsing -
