- Auglýsing -
- Sænska landsliðskonan Sofia Hvenfelt leikur ekki fleiri leiki á Ólympíuleikunum í Frakklandi. Hún meiddist alvarlega á hné í fyrri hálfleik viðureignar Svíþjóðar og Noregs í fyrrakvöld. Hvenfelt, sem var línukona númer eitt í sænska landsliðinu, hefur verið skipt út fyrir Olivia Löfqvist, eftir því sem sænska handknattleikssambandið greindi frá í gær.
- Hvenfelt var fyrir því óláni þar sem hún stóð í vörn í fyrri hálfleik að einum sóknarmanni norska liðsins var hrint með þeim afleiðingum að hún skall á utanvert vinstra hné Hvenfelt sem átti sér einskis ills von. Liðband er tognað. Vonir standa til að ekki hafi fleira farið úr skorðum.
- Norska landsliðskonan Camilla Herrem segist ekki hafa uppi nein áform um að hætta í handknattleik. Herrem, sem verður 38 ára í október og á tvö börn, segist ekkert sjá því til fyrirstöðu að berjast um sæti í norska landsliðinu ef það tekur þátt í Ólympíuleikunum í Los Angeles eftir fjögur ár.
- Fyrstu æfingaleikir liða fyrir næsta keppnistímabil fara fram þessa dagana. Í gærkvöld vann HF Karlskrona liðsmenn Amo, 31:28, á heimavelli en bæði lið koma til með að leika annað árið í röð í sænsku úrvalsdeildinni á næsta tímabili. Arnar Birkir Hálfdánsson var í leikmannahópi Amo í heimsókninni til Karlskrona. Með síðarnefnda liðinu leikar Dagur Sverrir Kristjánsson, Ólafur Andrés Guðmundsson og Þorgils Jón Svölu Baldursson.
- Auglýsing -
