- Auglýsing -
- H71 hafði betur gegn Kyndli í fyrsta úrslitaleik liðanna um færeyska meistaratitilinn í handknattleik kvenna í gær, 34:25. Leikurinn fór fram í Hoyvíkuhöllinni. Jakob Lárusson er þjálfari Kyndilsliðsins sem var marki undir að loknum fyrri hálfleik í gær. 15:14. Kyndilsliðið átti á brattann að sækja í síðari hálfleik leik gegn meisturum síðustu ára. Næst mætast liðin í Höllinni á Hálsi á miðvikudaginn. Liðið sem fyrr vinnur þrjá leiki vinnur meistaratitilinn.
- Gríðarleg eftirvænting ríkir í Færeyjum í dag fyrir landsleik Færeyinga og Austurríkismanna í síðustu umferð undankeppni Evrópumóts karla í handknattleik. Leikurinn fer fram í Bregenz í Austurríki og fylgdi fjölmennur hópur stuðningsmanna færeyska landsliðinu til Austurríkis.
- Eftir stórsigur Færeyinga á Úkraínumönnum á miðvikudagskvöldið í Þórshöfn á færeyska landsliðið von um að tryggja sér í fyrsta sinn þátttökurétt í lokakeppni EM í Þýskalandi á næsta ári. Til þess verða Færeyingar helst að krækja í eitt stig í leiknum í dag eða ef þeir tapa treysta á hagstæð úrslit í viðureign Úkraínu og Rúmeníu sem fram fer í Gummersbach í Þýskalandi.
- Landslið Þýskalands og Spánar mætast í EHF-bikarkeppni landsliða karla í Mercedes-Benz-Arena í Berlin. Í leiknum verður þjálfurum í fyrsta sinn heimilt að óska eftir að dómarar endurskoði ákvörðun sína. Hvor þjálfara má óska einu sinni eftir endurskoðun dómara á dómum sínum. Verða dómarar að sætta sig við þetta og athuga með aðstoð sjónvarpsupptöku hvort þeir eða þjálfarinn hafi rétt fyrir sér. Handknattleikssamband Evrópu samþykkti snemma árs að gera þessa tilraun í nokkrum leikjum á næstunni. Ef vel tekst til er stefnt á að taka þetta upp í reglum. Svipaðar reglur hafa verið í gildi í blaki á síðustu árum og gefist vel. Nánar má lesa um þessa nýjung hér.
- Danski handknattleiksmaðurinn Hans Óttar Lindberg sagði frá því í samtölum við danska fjölmiðla í gær að hann hafi þegið boð þýska liðsins Füchse Berlin um að leika með því í eitt ár til viðbótar eftir að forráðamenn félagsins skiptu um skoðun á dögunum. Þeir tilkynntu Lindberg í haust að honum stæði ekki til boða nýr samningur eftir yfirstandandi leiktíð. Einnig greindi Lindberg frá því að hann hafi ákveðið að ganga til liðs við næst efsta deildarliðið HØJ Elite sumarið 2024. Lindberg vill ljúka ferlinum hjá félaginu. HØJ Elite er með bækistöðvar í nágrenni Ølstykke á vesturhluta Sjálands.
- Auglýsing -
