- Auglýsing -
- OTP Bank-PICK Szeged vann annan leikinn á skömmum tíma í ungversku 1. deildinni í handknattleik í gær þegar liðið lagði HE-DO B. Braun Gyöngyös, 35:27, á heimavelli í annarri umferð deildarinnar og í fyrsta heimaleiknum.
- Janus Daði Smárason skoraði þrjú mörk fyrir Pick Szeged sem hafði mikla yfirburði í leiknum. M.a. var tíu marka munur, 18:8, eftir fyrri hálfleik.
- Kristján Örn Kristjánsson, Donni, skoraði fjögur mörk og átti þrjár stoðsendingar í fyrsta leik sínum með Skanderborg AGF í dönsku úrvalsdeildinni í gær. Skanderborg AGF vann Mors-Thy á heimavelli, 28:25.
- Orri Freyr Þorkelsson og liðsfélagar í portúgalska meistaraliðinu Sporting Lissabon hófu deildarkeppnina með sigri á Águas Santas, 41:30, á útivelli í gær. Orri Freyr skoraði fjögur mörk. Sporting var fimm mörkum yfir að loknum fyrri hálfleik, 21:16.
- Óðinn Þór Ríkharðsson skoraði níu mörk, þar af fjögur úr vítaköstum, þegar Kadetten Schaffhausen vann einn helsta andstæðing sinn, Pfadi Winterthur, í A-deildinni í Sviss, í gær. Leikurinn fór fram í Winterthur og var hluti af 2. umferð deildarinnar. Kadetten hefur unnið tvær fyrstu viðureignir sína í deildinni.
- Fredrikstad Bkl tapaði fyrir meisturum Vipers Kristiansand, 36:21, í annarri umferð norsku úrvalsdeildarinnar í kvennaflokki í gær. Þetta var annað tap Fredrikstad Bkl í deildinni á leiktíðinni sem hófst um síðustu helgi. Elías Már Halldórsson er þjálfari Fredrikstad Bkl.
- Auglýsing -
