- Auglýsing -
- Janus Daði Smárason skoraði átta mörk og átti tvær stoðsendingar þegar SC Magdeburg vann Lemgo, 34:28, á útivelli í þýsku 1. deildinni í handknattleik í gær. Ómar Ingi Magnússon skoraði sjö mörk fyrir Magdeburg, fjögur þeirra úr vítaköstum, auk tveggja stoðsendinga. Gísli Þorgeir Kristjánsson skoraði þrjú mörk og átti eina stoðsendingu.
- Magdeburg er áfram efst í þýsku 1. deildinni. Liðið hefur nú 52 stig í 29 leikjum. Füchse Berlin er einnig með 52 stig en hefur lokið 31 leik. Flensburg er í þriðja sæti með 46 stig eftir 30 leiki.
- Haukur Þrastarson skoraði tvö mörk þegar lið hans, Industria Kielce, tapaði með níu marka mun fyrir Orlen Wisła Płock, 29:20, í úrslitaleik pólsku bikarkeppninnar í handknattleik í gær. Orlen Wisła Płock var með fjögurra marka forskot að loknum fyrri hálfleik, 15:11. Þetta var þriðja árið í röð sem Wisla vinnur bikarkeppnina.
- Dana Björg Guðmundsdóttir og félagar hennar í Volda töpuðu fyrir Follo HK í oddaleik liðanna í umspili um sæti í norsku úrvalsdeildinni í gær, 34:23. Leikurinn fór fram á heimavelli Follo. Dana Björg skoraði tvö mörk og var einu sinni vikið af leikvelli.
- Auglýsing -
