- Auglýsing -
- KA vann Víking í tveimur æfingaleikjum karlaliða félaganna á Akureyri um nýliðna helgi. Fyrri leiknum lauk, 29:27, og þeim síðari 33:30. Bæði lið eiga sæti í Olísdeild karla á næsta keppnistímabili.
- Andri Már Rúnarsson skoraði sex mörk og Viggó Kristjánsson fjögur þegar SC DHfK Leipzig vann Wisla Plock, 29:23, á æfingamóti í Póllandi helgina. SC DHfK Leipzig vann einnig ungverska liðið MOL Tatabánya KC, 33:31, á mótinu. Lærisveinar Rúnars Sigtryggssonar, þjálfara SC DHfK Leipzig hafa ekki stigið feilspor í æfingaleikjum á undirbúningstímabilinu. Hvert liðið af öðru hefur legið í valnum.
- Arnór Snær Óskarsson skoraði fjögur mörk fyrir Rhein-Neckar Löwen sem vann svissneska liðið HC Kriens-Luzern í æfingaleik í gær, 28:27. Leikurinn var reyndar stöðvaður eftir 53 mínútur vegna mikils hita í keppnishöllinni auk þess sem gólfið var hált. Þótti ekki forsvaranlegt að halda áfram leik. Ýmir Örn Gíslason lék að vanda með Rhein-Neckar Löwen og þá fyrst og fremst í vörninni.
- Gummersbach vann Hannover-Burgdorf í úrslitaleik Heide-Cup-æfingamótsins í Þýskalandi á sunnudaginn, 28:25. Elliði Snær Viðarsson og Hákon Daði Styrmisson voru í liði Gummersbach undir stjórn Guðjóns Vals Sigurðssonar. Hvorki Elliði né Hákon skoruðu mark. Félagi þeirra, Tibor Ivanisevic markvörður, reyndist sannarlega betri en enginn í markinu í úrslitaleiknum. Heiðmar Felixson er aðstoðarþjálfari Hannover-Burgdorf.
- Markvarðaparið hjá franska meistaraliðinu í handknattleik karla PSG, Andreas Palicka og Jannick Green, hefur framlengt samning sinn við félagið til ársins 2025. Palicka kom til félagsins fyrir tveimur árum en Green rak á fjörurnar fyrir ári.
- Auglýsing -
