- Auglýsing -
- Kristján Halldórsson var eftirlitsmaður á viðureign Skjern og IK Sävehof í 3. umferð riðlakeppni Evrópudeildar karla í handknattleik sem fram fór í Skjern á Jótlandi í gærkvöld. IK Sävehof vann leikinn með eins marks mun, 29:28. Tryggvi Þórisson var í leikmannahópi IK Sävehof sem er í þriðja sæti deildarinnar.
- Svavar Ólafur Pétursson og Sigurður Hjörtur Þrastarson verða dómarar á viðureign Bjerringbro/Silkeborg og Flensburg í síðustu umferð riðlakeppni Evrópudeildar karla í handknattleik á næsta þriðjudag. Leikurinn fer fram í Silkeborg á Jótlandi.
- Þýski handknattleiksþjálfarinn Maik Machulla er sagður vera í viðræðum við Aalborg Håndbold um að taka við þjálfun danska liðsins í sumar þegar Stefan Madsen lætur af störfum. Machulla þjálfaði Flensburg frá 2017 til 2023 að honum var sagt upp síðla á tímabilinu í kjölfar þess að illa hafði gengið á leikvellinum um nokkurt skeið.
- Norsku landsliðsmennirnir Gøran Johannessen og Magnus Gullerud hafa ákveðið að leika áfram með norska meistaraliðinu Kolstad en vafi lék á um hvort þeir tækju slaginn áfram eða réru á ný mið eins og Magnus Rød sem samið hefur við Pick Szeged frá og með sumrinu eins og áður hefur komið fram á handbolti.is.
- Armel Atingre markvörður Budućnost er gjaldgeng með landsliði Svartfjallalands í handknattleik kvenna. Alþjóða handknattleikssambandið hefur samþykkt þátttöku hennar. Atingre fæddist Fílabeinsströndinni en hefur um árabil leikið með Atingre. Nokkuð er síðan hún fékk ríkisborgararétt í Svartfjallalandi og hefur nú uppfyllt öll skilyrði til þess að leika með landsliðinu og verður í fyrsta sinn í keppnishóp annað kvöld þegar Svartfellingar mæta Serbum í undankeppni Evrópumótsins.
- Auglýsing -
