- Auglýsing -
- Leikmenn, þjálfarar og aðrir starfsmenn íslenska landsliðsins í handknattleik kvenna færa sig um set í dag. Eftir nærri viku veru í Lillehammer við kappleiki og æfingar heldur hópurinn til Stavangurs þar sem íslenska landsliðið leikur þrjá leiki í riðlakeppni heimsmeistaramótsins, þann fyrsta á fimmtudaginn gegn Slóvenum. Lokasprettur undirbúningsins fyrir HM er þar með að hefjast með komunni til Stavangurs.
- Högg sem landsliðskonan Díana Dögg Magnúsdóttir fékk á vinstri öxl snemma síðari hálfleiks gegn Angóla í síðasta leik íslenska landsliðsins á Posten Cup-mótinu á sunnudaginn dregur ekki dilk á eftir sér. Hún verður þar af leiðandi klár í slaginn með íslenska landsliðinu í fyrsta leik á heimsmeistaramótinu gegn Slóvenum á fimmtudaginn.
- Valero Rivera er hættur þjálfun karlalandsliðs Katar eftir 10 ár. Þegar landsliði Katar lánaðist ekki að tryggja sér í handknattleikskeppni HM í síðasta mánuði varð niðurstaðan sú að Spánverjinn, sem stendur á sjötugu, léti af störfum. Við starfinu hefur tekið Serbinn Goran Džokić.
- Rivera var um árabil landsliðsþjálfari Spánar og undir hans stjórn urðu Spánverjar heimsmeistarar 2013 á heimavelli. Hann lét af störfum í framhaldinu og tók við starfinu í Katar sem byggði landslið sitt í framhaldinu upp á erlendum leikmönnum sem skiptu um ríkisfang. Undir stjórn Rivera lék landslið Katar til úrslita á HM 2015 á heimavelli en tapaði fyrir Frakklandi í úrslitaleiknum.
- Markus Baur sem tók við þjálfun þýska liðsins Göppingen í desember á síðasta ári lætur af störfum að loknum keppnistímabilinu sem stendur nú yfir. Göppingen tilkynnti þetta um helgina.
- Ólympíumeistarar Frakka í handknattleik kvenna, sem verða með íslenska landsliðinu í riðli á HM kvenna, unnu Suður Kóreu, 36:19, og Senegal, 32:19, á æfingamóti í Frakklandi um nýliðna helgi. Ljóst er að franska landsliðið mætir ógnar sterkt til leiks á HM eins og þess er von og vísa.
- Landslið Slóvena sem mætir íslenska landsliðinu í fyrstu umferð D-riðils heimsmeistaramótsins í Stavangri á fimmtudaginn virðist ekkert hafa leikið vináttuleiki í aðdraganda HM. Ef marka má Facebook-síðu handknattleikssambands Slóveníu hefur landsliðið æft af miklum móð síðustu daga í Ljubljana. Ljóst er að Slóvenar halda spilunum þétt að sér.
- Auglýsing -
