- Auglýsing -
- Færeyska ungstirnið Óli Mittún er vongóður um að verða með færeyska landsliðinu þegar það tekur þátt í Evrópumótinu í handknattleik í fyrsta sinn. Óli meiddist á ökkla í kappleik með liði sínu, Sävehof, á milli jóla og nýárs. Auk Óla er hinn þrautreyndi Peter Krogh einnig að glíma við meiðsli. Fyrsti leikur Færeyinga á EM verður við Slóvena í Berlín 11. janúar.
- Færeyingar mæta Belgum í tveimur vináttuleikjum í Þórshöfn áður en landsliðið fer til Þýskalands. Fyrri leikurinn verður á föstudaginn og hinn síðari daginn eftir. Gríðarleg eftirvænting er í Færeyjum fyrir EM eins og gefur að skilja og hafa þúsundir Færeyinga keypt aðgöngumiða á leiki riðlakeppninnar.
- Áfram er los á ferli þýska handknattleiksmannsins Christian Dissinger. Hann yfirgaf ungverska liðið PLER-Budapest um áramótin eftir stutta veru. Dissinger segist ekki hafa kunnað við sig hjá félaginu en hann samdi við félagið í október. Óvíst er hvað tekur við hjá Dissinger sem hefur átt erfitt með að festa rætur síðustu árin. Dissinger var í sigurliði Þýskalands undir stjórn Dags Sigurðssonar á EM 2016 en hefur síðan lítið leikið með landsliðinu.
- Evrópumeistarar kvenna í handknattleik undanfarin þrjú ár, Vipers Kristiansand, var valið íþróttalið Noregs á uppskeruhátíð íþróttasambands Noregs í kringum áramót.
- Auglýsing -
