- Auglýsing -
- Auglýsing -
- Auglýsing -

Molakaffi: Metaðsókn í Þýskalandi, meistarakeppni, Andersson

Vaxandi áhugi er fyrir handknattleik í Þýskalandi. Ljósmynd/Hafliði Breiðfjörð
- Auglýsing -
  • Aldrei hefur verið meiri aðsókn á leiki efstu deildar í þýska handknattleiknum í karlaflokki en á síðustu leiktíð. Að jafnaði voru 5.216 áhorfendur á hverjum leik. Er þetta í fyrsta sinn sem fleiri en fimm þúsund sækja hvern leik að jafnaði á einu keppnistímabili. Til samanburðar má nefna að 5.065 áhorfendur voru að jafnaði á hverjum leik Meistaradeildar karla í handknattleik á nýliðinni leiktíð.
  • Sjö af 18 liðum þýsku 1. deildarinnar fengu yfir 100 þúsund áhorfendur á heimaleiki sína á síðasta tímabili. Þar af rufu Hannover-Burgdorf og Erlangen 100 þúsund áhorfendamarkið í fyrsta skipti.
  • Eins og stundum áður þá mættu flestir á heimaleiki THW Kiel, 172.714, eða 10.159 að meðaltali. Næst á eftir var Füchse Berlin sem laðaði 142.298 áhorfendur að sér sem gerir 8.370 áhorfendur á hvern leik. Þrátt fyrir slakt gengi á vellinum þá var þriðja mesta aðsóknin á heimaleiki Rhein-Neckar Löwen, rétt rúmlega átta þúsund á hverjum heimaleik.
  • Meistarar SC Magdeburg fengu 111.722 á heimaleiki sína í þýsku 1. deildinni, eða 6.571 á hvern leik. Vandi félagsins liggur í að keppnishöllin í Magdeburg tekur ekki fleiri áhorfendur í sæti.
  • Þýski handknattleikurinn hefst aftur laugardaginn 31. ágúst í Merkur Spiel Arena í Düsseldorf með tveimur leikjum í Meistarakeppni karla og kvenna. Annarsvegar mætast meistarar HB Ludwigsburg (áður SG BBM Bietigheim) og bikarmeistarar Tus Metzingen í kvennaflokki og hinsvegar meistarar og bikarmeistarar í karlaflokki SC Magdeburg og Füchse Berlin, silfurlið deildarkeppninnar. Þetta verður í fyrsta sinn sem sá háttur er hafður á að leikir meistarakeppni karla og kvenna fara fram sama dag og á sama stað.
  • Hinn gamalreyndi sænski handknattleiksmaður Kim Andersson leikur ekki með Ystads IF á fyrstu mánuðum sænsku úrvalsdeildarinnar á næstu leiktíð vegna meiðsla. Ystads IF, sem tapaði fyrir Sävehof í úrslitum um meistaratitilinn í vor, hefur krækt í Kristian Olsen frá Nordsjælland í Danmörku. Ekki kemur fram hvað hrjáir Andersson sem er á 42. aldursári og hefur leikið með Ystads IF í níu ár.
- Auglýsing -
- Auglýsing -
- Auglýsing -
- Auglýsing -
- Auglýsing -
- Auglýsing -