- Auglýsing -
- Víst er Nantes, liðið sem Viktor Gísli Hallgrímsson leikur með, verður a.m.k. í öðru sæti í frönsku 1. deildinni í handknattleik. Nantes vann Montpellier í gærkvöld, 33:31, og situr sem fastast í öðru sæti og hefur sex stiga forskot á Montpellier þegar liðin eiga tvo leiki eftir. Annað sæti veitir Nantes rétt á að sækja um boðskort til þátttöku í Meistaradeild Evrópu á næsta keppnistímabili.
- Viktor Gísli tók ekki þátt í leiknum í gær fremur en í síðustu viðureignum liðsins. Hann er frá keppni vegna meiðsla.
- PSG er efst í frönsku 1. deildinni með 51 stig eftir 27 leiki. Liðið er stigi ofar en Nantes og á leik til góða gegn Nimes.
- Grétar Ari Guðjónsson varði sex skot, 30%, þegar lið hans Sélestat vann Caen, 33:32, í 2. deild franska handknattleiksins í gærkvöld. Grétar Ari stóð annan hálfleikinn í marki Sélestat. Liðið er í fjórða sæti deildarinnar með 36 stig þegar tvær umferðir eru eftir auk þess að eiga víst sæti í umspili um sæti í 1. deild. Umspilið tekur við eftir að deildarkeppninni lýkur.
- Eftir að Barcelona vann Huesca, 41:29, á heimavelli í næst síðustu umferð spænsku 1. deildarinnar tóku liðsmenn við sigurlaunum sínum. Barcelona varð nú spænskur meistari í handknattleik karla í 31. sinn, þar af í 14. skipti í röð. Eins og síðustu ár hefur Barcelona haft mikla yfirburði í deildinni á tímabilinu og unnið 28 af 29 leikjum til þessa og gert eitt jafntefli.
- Bidasoa Irun er í efsta sæti fyrir lokaumferðina eftir viku og Granollers hafnar í þriðja sæti en röð þriggja efstu liðanna á ekki eftir að breytast í síðustu umferðinni.
- Hollenska línukonan, Merel Freriks, hefur samið við norska meistaraliðið Vipers Kristiansand frá og með næstu leiktíð. Hún verður þriðja hollenska landsliðskonan í herbúðum Vipers á næstu leiktíð. Freriks er að ljúka tveggja ára tímabili með Brest Bretagne í Frakklandi. Freriks hefur átt sæti í hollenska landsliðinu síðustu ár og var m.a. í sigurliðinu á HM 2019.
- Auglýsing -
