- Auglýsing -
- Pfadi Winterthur jafnaði metin í undanúrslitaeinvíginu við Kadetten Schaffhausen um svissneska meistaratitilinn í handknattleik í gær með níu marka sigri á heimavelli, 34:25. Landsliðsmaðurinn Óðinn Þór Ríkharðsson skoraði sex mörk fyrir Kadetten, þar af fimm úr vítakaöstum.
- Winterthur og Kadetten eru þar með jöfn, með einn vinning hvort. Þriðja viðureignin verður í Schaffhausen á sunnudaginn. Vinna þarf þrjá leiki til þess að komast í úrslit.
- Einnig er jafnt í hinni rimmu undanúrslitanna í Sviss þar sem mætas HC Kriens og GC Zürich sem höfnuðu í öðru og þriðja sæti svissnesku deildarinnar í vor. Hvort lið hefur einn vinning.
- Storhamar, liðið sem Axel Stefánsson þjálfar við annan mann, lagði Sola með níu marka mun, 28:19, á útivelli í næst síðustu umferð norsku úrvalsdeildarinnar í kvennaflokki í gær. Storhamar situr tryggilega í öðru sæti deildarinnar.
- Fredrikstad Bkl. tapaði með 21 marks mun fyrir meisturum Vipers Kristiansand, 40:19, í norsku úrvalsdeildinni í gær. Elías Már Halldórsson er þjálfari Fredrikstad Bkl. sem er í fimmta sæti.
- Elverum vann Bergen í síðasta leik átta liða úrslita í úrslitakeppni karla í norsku úrvalsdeildinni í gær, 29:28. Öðrum viðureignum átta liða úrslita lauk á miðvikudagskvöld.
- Elverum mætir Degi Gautasyni og samherjum í ØIF Arendal í undanúrslitaeinvígi. Fyrsti leikurinn verður í Elverum á föstudaginn eftir viku.
- Sigvaldi Björn Guðjónsson og samherjar í Kolstad leika gegn Drammen í hinni rimmu undanúrslitanna í norsku úrvalsdeildinni. Róbert Sigurðarson leikur með Drammen. Kolstad og Drammen mætast í fyrsta sinn á miðvikdudaginn, síðasta vetrardag, í Þrándheimi.
- Auglýsing -
