- Auglýsing -
- Óðinn Þór Ríkharðsson skoraði sex mörk, þar af eitt úr vítakasti, þegar lið hans, Kadetten Schaffhausen, vann Alpla Hard, 37:31, í æfingaleik í Hard í Austurríki. Hannes Jón Jónsson er þjálfari Alpla Hard og Tumi Steinn Rúnarsson er nýr liðsmaður félagsins. Ekki liggja á lausu upplýsingar um það hvort Tumi Steinn skoraði í leiknum sem var væntanlega sá fyrsti sem hann lék í búningi Alpla Hard.
- Sænska úrvalsdeildarliðið IFK Kristianstad, sem Einar Bragi Aðalsteinsson gekk til liðs við í sumar frá Íslandsmeisturum FH, tapaði fyrir Skjern, 34:28, í æfingaleik í fyrradag. Daginn áður tapaði liðið fyrir Bjerringbro/Silkeborg, 35:31. Engum sögum fer að því hvort Einar Bragi skoraði í leikjunum.
- Fram kemur á Facebook-síðu Bjerringbro/Silkeborg að Guðmundur Bragi Ástþórsson hafi leikið sinn fyrsta leik fyrir lið félagsins gegn IFK Kristianstad. Hann hafi sýnt lipurleg tilþrif en ekki náð að skora. Ennfremur kemur fram að Guðmundur Bragi verði kallaður „Gummi“ innan félagsins og eru stuðningsmenn beðnir um að æfa sig í að hrópa „Gummi“ þegar hann skorar í leikjum keppnistímbilsins sem hefst eftir um mánuð.
- Danska úrvalsdeildarliðið Fredericia HK, sem Arnór Viðarsson og Einar Þorsteinn Ólafsson leika með vann næst efsta deildarliðið HØJ Elite, 34:26, í fyrsta æfingaleik tímabilsins á heimavelli í gær. Guðmundur Þórður Guðmundsson þjálfar Fredericia HK en liðið varð í öðru sæti í dönsku úrvalsdeildinni á síðustu leiktíð og tekur þátt í Meistaradeild Evrópu á komandi tímabili.
- Auglýsing -
