- Auglýsing -
- Óðinn Þór Ríkharðsson landsliðsmaður í handknattleik var ekki í leikmannahópi Kadetten Schaffhausen þegar liðið tapaði fyrir HC Kriens-Luzern, 38:36, í svissnesku A-deildinni í handknattleik á heimavelli í gærkvöld. Þetta var fyrsta tap Kadetten í deildinni en með leiknum lauk 3. umferð deildarinnar. Óðinn Þór fékk leyfi frá leiknum vegna þess að unnusta hans á von á barni hvað úr hverju.
- Danski markvörðurinn, Niklas Landin, fer í speglun á hné síðar í þessum mánuði og verður frá keppni í sex til átta vikur. Landin fann til eymsla í hné eftir þátttöku með landsliðinu á Ólympíuleikunum í sumar hvar hann kvaddi landsliðið með því að vinna til gullverðlauna. Skarð verður fyrir skildi hjá danska meistaraliðinu Aalborg Håndbold meðan Landin verður fjarverandi enda stendur liðið í ströngu jafnt heimafyrir og í Meistaradeild Evrópu sem hófst í gærkvöld.
- Auglýsing -
