- Auglýsing -
- Óðinn Þór Ríkharðsson og félagar í Kadetten Schaffhausen komust í átta liða úrslit bikarkeppninnar í Sviss í gærkvöld með sigri á TV Möhlin, 34:24, á útivelli. Óðinn Þór skoraði sex mörk, þar af tvö úr vítaköstum.
- Norska landsliðskonan Nora Mørk hefur skrifað undir nýjan samning við danska meistaraliðið Esbjerg. Samningurinn gildir fram á mitt árið 2026. Mørk gekk til liðs við Esbjerg sumarið 2022. Hún er sögð hafa verið með tilboð upp á vasann en kosið að vera áfram á vesturströnd Jótlands. Tomas Axnér landsliðsþjálfari Svía tekur við þjálfun Esbjerg-liðsins í sumar þegar Jesper Jensen lætur af störfum og einbeitir sér að danska kvennalandsliðinu.
- Ungverski handknattleiksmaðurinn Dominik Mathe kveður Paris Saint-Germain í sumar og gengur til liðs við Industria Kielce. Hann hefur skrifað undir samning sem gildir til ársins 2027.
- Danski handknattleiksmaðurinn Michael Damgaard verður leikmaður Evrópumeistara SC Magdeburg fram til ársins 2025. Tilkynnt var í gær um að hann hafi skrifað undir nýjan samning við félagið.
- Franski markvörðurinn Samir Bellahcene sem kom til Kiel á skammtímasamningi á haustdögum hefur skrifað undir lengri samning við félagið sem gildir fram til ársins 2025. Bellahcene kom til Kiel þegar ljóst var að meiðsli landa hans, Vincent Gerard, voru alvarlegri en í fyrstu var talið. Gerard er ekki enn byrjaður að leika með Kiel og hefur ákveðið að hætta í sumar.
- Auglýsing -
