- Auglýsing -
- Óðinn Þór Ríkharðsson og samherjar í Kadetten Schaffausen komust í undanúrslit svissnesku A-deildarinnar í handknattleik karla í gærkvöld þegar þeir unnu Wacker Thun í þriðja sinn í fjórum viðureignum í átta liða úrslitum, 30:26. Óðinn Þór skoraði þrjú mörk, eitt þeirra úr vítakasti.
- Kadetten mætir Pfadi Winterthur í undanúrslitum. Fyrsta viðureign liðanna verður á sunnudaginn í Schaffhausen. HC Kriens og GC Zürich eigast við í hinni viðureign undanúrslitanna. Vinna þarf þrjá leiki til þess að öðlast sæti í úrslitum. Kadetten varð meistari á síðasta ári.
- Tryggvi Þórsson og félagar hans í IK Sävehof tryggðu sér einnig sæti í undanúrslitum í gær, reyndar í sænsku úrvalsdeildinni. IK Sävehof vann Malmö í þriðja sinn á heimavelli í gær, 34:24. Malmö vann ekki leik í rimmu liðanna þar sem áttust við deildarmeistararnir og liðið í áttunda sæti. Tryggvi skoraði ekki mark í leiknum í gær.
- IK Sävehof mætir annað hvort IFK Kristianstad eða Hammarby í undanúrslitum. Fyrrnefnda liðið komst yfir, 2:1, í vinningum talið í gær, með sigri á heimavelli, 32:31.
- Norski handknattleiksmaðurinn Magnus Abelvik Rød hefur tilkynnt að hann gefi ekki kost á sér í landsliðið fyrir Ólympíuleikana í sumar. Rød meiddist í upphafi ársins og hefur síðan verið í endurhæfingu. Þrátt fyrir að vel gangi þá telur Rød rétt að gefa hugsanlegt sæti í landsliðinu upp á bátinn til að tryggja fullkominn bata.
- Rød gengur til liðs við ungverska liðið Pick Szeged fyrir næstu leiktíð að loknu einu ári í herbúðum norska meistaraliðsins Kolstad.
- Patrick Westerholm var sagt upp störfum hjá danska úrvalsdeildarliðinu Bjerringbro/Silkeborg í gær. Hvorki hefur gengið né rekið hjá liðinu síðustu vikur og það tapað sjö af síðustu átta leikjum. Síðast tapaði Bjerringbro/Silkeborg fyrir Ribe-Esbjerg í úrslitakeppninni um danska meistaratitilinn í fyrrakvöld á heimavelli, 35:34. Von liðsins um sæti í undanúrslitum er veik. Lengi framan af tímabilinu var Bjerringbro/Silkeborg talið líklegt til þess að veita Aalborg keppni um meistaratitilinn. Annað hefur orðið raunin.
- Auglýsing -
